National Unity Government (NUG) nih ralhraang bantuk in rian an ttuanmi hi ka duh lemmi si lo, hriamnaam tlai lo le dai tein ram buainak silhnalh ding in Daw Aung San Suu Kyi nih forhfialnak a tuah hna tiah Min Aung Hlaing ralhraang pawl nih lih news an thlah tawnnak news paper bultan hmanthlaak hmang in social media cung ah an thlah.
Hi kong he pehtlai in sihni Daw Min Min Soe nih “U Htun Htun Oo timi min hmang in social media cungah hmanthlak pakhat a kai, mah hi Daw Aung San Suu Kyi nih chimmi zong si lo, kan mah sin zongah a chim bal lo i kan mah chung zong in ho hmanh nih kan chim bal lo, CRPH le NUG hna hi Daw Aung San Suu Kyi nih a cohlaan hna lo ti phun in ca an thlah”
“Hi kong he pehtlai in ramdang lei tiang nih bia halnak an kan tuah, mah kong hi Daw Aung San Suu Kyi nih kan mah sin ah a chim lo bantuk in zei bantuk media hna sin zongah a chim lo, mah ti ka vun langhter duhnak cu Sihni phu hna sin ah a chim tiin an langhter ruangah si” tiah a chim.
News Paper bultan hmanthlak cu a luan ciami September ni 17 ni le thla khenh in Hun Htun Oo (naypidaw) sin in a chuak, Daw Aung San Suu Kyi nih hin NUG, CRPH le PDF hna nih meithal tlai in ram buainak silhnalh an timhmi hi lam dik a si lo caah ka khuaruahhar nga, kei mah theih lo in a tu bantuk in cawl canghnak an tuahmi hi a theih zong ka thei lo.
“Ram buainak hi dai tein a phi kawl duh tu kei mah zei an ka rel lo le an ka nehsawh bia zong a si, mipi hna nih NUG, CRPH le People Defense Force hna nih an tuahmi thil hi thazaang zong ka pe hna lo tiah Daw Aung San Suu Kyi nih a sihni pawl sin ah a chiam” tiah ralhraang pawl nih cun an langhter.
