Sagaing ramtthen, peng 10 chung ah Min Aung Hlaing le a ralhraang pawl nih internet an phiat hnu in khua kip ah luhhnawh in an kah thluahmah hna ruangah tu tiang, internet an phiatnak in ni 4 chung ah minung 29 bak an thah cang hna, thah tongmi 29 hna hi tu tiang ah fehternak an tuahmi si i a tak tak ah cun mah nak hmanh in an tam deuh rih kho.
A luan ciami September ni 24, kum 2021 ah khan Sagaing ramtthen, Yinbamin peng, Yin Paung Tai timi khua cu Min Aung Hlaing ralhraang pawl nih an luh hnawh hnu ah cu a ruang um lo bak in Ko Myint Than Oo (kum 30) thilak an kah. September ni 25 ah khan Minkin peng, Taung Dwin Chaung ah ralhraang le PDF kah dohnak chuak in mah ni ah hin PDF mino 15 bak an thi, mah ni ah hin ralhraang lei zong in pa 5 an thi ve.
Nizan September ni 26, kum 2021 ah Khin Oo peng chung Aung Thar, Hman Daw le Kyun Le khua ah lut in khuami an tlaih hna, cun ralhraang kahnak in khuami pa 2 an thi i pakhat hliamhma pu, cu hlei ah khuami pahnih an tlau riha thimi hna le a tlaumi hna hi mi zei an si zong theih khawh si rih lo.
Yinmabin peng chung zongah ralhraang thazaang 100 hrawng nih Banh Buai le Kan Suh timi khua hna ah lut in phawchonnak ding caah an tlaih hnami sianghleirun siahngakchia pakhat telh in mino pa 3 an thah hna. Cun zan zongah Yinmabin peng, Nabutaw le Kuahchaung timi khua hna ah lut in bomb le meithal an kah chih ruangah kum 60 nu pakhat telh in minung pa 5 an thi.
Cun nizan September ni 26 tthiam ah Kalay peng, Thasi khua ah Min Aung Hlaing ralhraang pawl nih CDM tuah tu palik zung rianttuan mi Ko Zaw Myo Htwat le khuami sawsawh Ko Than Hteik cu an khua leng, thlaanmual ah kalpi in an thah hna.
Tuni September ni 27 ah Monywa peng, Mung Zuar le Cemung khua zong ralhraang pawl nih luh hnawh in khuami pa 2 an thah hna, pakhat an kahmi hna cu motor in an rial chap rih, a luan ciami September ni 24 (internet an phiat hnu) in tuni September ni 27 tiang ah ralhraang kut in thimi 29 an phan cang.
