Kachin ramkulh chungah Kachin Independent Army (KIA) hna hmunhma bak simi Laiza khua pawng ah Min Aung Hlaing ralhraang pawl nih thazaang an chap thluahmah tiah thawngpaang theih a si, Moe Moke peng, Dawphungyang khua in ralhraang 300 hrawng cu KIO nih an control nak hmunhma simi Laiza lei ah tuzing ah khan an kal thluahmah.
Laiza khua pawng, La Ja Yang le Hka Ya Bum hrawng ah ralhraang thazaang chap ding in timhlamhnak an nei tiah Dawh Phung Yang khuami pakhat nih KNG ah a chim, tuzing dei ka te khan an chuak cang, motor zong si loin an ke bak in an kal, La Ya Yang le Hka Ya Bum lei ah kal an i tim ko tiah khuami pakhat nih a chimmi cu si.
Tu thla chung ah hin Dawh Phung Yang in Laizaw pawngkam hrawng ah ralhraang pawl nih thazaang chap thluahmah an timh, cun Num Lanh timi khua ah hmunhma khuarmi ralhraang 200 hrawng zong Alaw Bum le Shan Dung Bum lei ah an kal tthan hna.
Tuzing ah Alaw Bum lei panh in kalmi ralhraang pawl hi nizan September ni 19 zan ah khan Bamaw lei in Num Lanh sakhan lei ah a rak phanmi an si, a luan ciami September ni 8 lio zongah khan Dawh Phung Yang in ralhraang 200 leng cu KIO control nak Battalion 19 lei ah an rak kal cang.
