Sagaing ramtthen, Monywa peng chung, Monzuai khua le Cemung khua pahnih cu tuni September ni 27, kum 2021 zing suimilam 5:30AM khan Min Aung Hlaing khuachia ralhraang pawl nih an dum hna i khuami an thah thluahmah hna, khua chung inn zong khangh dih an timh, khuami hna hi zaam kho loin khua chungah an i hreng dih.
Hi kong he pehtlai in pengtlaangmi pakhat nih “Monzuai le Cemung khuahnih ning bak in ralhraang nih an kulh dih, tuzing suimilam 5:30AM hrawng khan an kah hna, tu tiang ah khuami pa 2 an thi cang i tlaih tongmi zong an um hna” tiah a chim.
Tu hi khuami pakhat ruak cu khua chung lam cung ah a bawk ko, ralhraang nih an kah thahmi si, meithal in an kah hnu ah motor in an rial rih, Mon Zuai le Cemung khua ah ralhraang uknak kan duh lo tiah nifatin te sandah piah pengmi an si caah Min Aung Hlaing khuachia ralhraang pawl nih tu bantuk in an tuahto hnanak hi si.
Khuami pakhat a thi timi cu fehter si ko, neihniam deuh ah ummi organization lei nih rak kan zuan hnawh hraam uh tiah kan in hal hna, bawmhnak zong kan in hal ko hna, tu hi kan khua zong mei khangh an timh cang tiah khuami pakhat nih a chim ve.
Tu tiang ah hin ralhraang nih khuami pa 2 an thah cang hna i pa 10 nak tlawm lo an tlaih hna, tlaih a tongmi hna cu an hrem chih hna caah a thimi zong tunak in an karh kho rih.
