Kachin ramkulh Tanaing khua lei panh in kalmi Min Aung Hlaing ralhraang pawl phur tu motor pa hna cu tuni September ni 4, kum 2021 zing ah khan Kachin Independent Army (KIA) ralkap nih mine bomb in an puah hna tiah thawngpaang theih a si.
Tuzing suimilam 11:30AM hrawng ah khan ralhraang 100 hrawng le an riahcaw phur tu motor pa 3 cu KIA nih Maran Ka Thaung timi khua le Makok Zut timi khua kar ah mine bomb in an phomh hna hi si, “bomb an puah hnanak hi Maran Kathaung le Makokzut khua kar hmun rawn zawn ah si, kan nih hi mah ka pawng ah cun kan um”
“Ralhraang motor pa 3 mine bomb in voi 2 hrawng an puah hna hnu ah ralhraang pawl cu motor cung in an zuan i ramhlak lei ah an zaam, mine bomb an puahmi nih motor hi a kheng deuh rua hna lo, hnu lei ah an kir tthan, hliamhma pumi le thimi zei zat an um tu cu kan thei lo” tiah khuami pakhat nih a chim.
Mine bomb puah an tonnak hmun ah ralhraang pawl nih ruahpadamh in bomb an kah thluahmah ve Marankathaung khua luh lainak zawn chek gate in aa chokletmi an chek thluahmah hna, an cuannak motor bomb puah a ton hnu ah ralhraang pawl cu an ke in Lawar khua lei ah an kal.
