Sagaing ramtthen khualipi pakhat simi Monywa peng chungah tuni September ni 23, kum 2021 zing suimilam 8:00AM hrawng ah khan Tanmanih phu chungtel Khunsa hruaimi ralkap phu le Chaung Oo PDF hna fonh in Min Aung Hlaing ralhraang pawl cuannak motor pahnih bom in an tthuat hna.
Hi kong he pehtlai in PDF lei in ttuanvo nei tu pakhat nih “ralhraang pawl cuannak motor pa 2 hi Min Mu in Monywa lei ah an vun ra, Nat Yi Kan, Yi Pu Sa timi lamkuaih zawn an phanh ah mine bomb zun 9 bak in PDF lei nih kan tthuat hna i ralhraang motor an pahnih ning in an rawh caah ralhraang lei in a tlawm bik pa 6 cu an thi hrim lai, hliamhma pumi tu cu an tam ngai lai” tiah PDF lei in ttuanvo nei tu nih a chimmi cu si.
PDF nih ralhraang motor bomb in an puah hna hnu tlawmpaal ah mizaw phurhnak motor pawl an rak phan i ralhraang lei in hliamhma pumi pawl cu Monywa lei ah a kalpi hna tiah mit in hmu tu khuami pakhat nih a chim.
Sagaing ramtthen, Minmu peng chung zongah Min Aung Hlaing ralhraang palik bo 2 pa cu Beer dawr chung a tthut lio ah lamhlaat in meithal zun 4 bak in an kah, a paw ah zun 2 nih khen i a phei zawn ah zunkhat nih khen, sizung ah an tlik pi colh i a thih le thih lo bel theih khawh si rih lo.
