Mipi thimmi cozah sin in uknak chut tu le mipi a kan that cuahmah tu Min Aung Hlaing ralhraang pawl cu Shan ramkulh le Kayah ramkulh aa ritnak zawn, Hpekhone lei ah thazaang tampi hmang in an rak luh ruangah Karenni ralkap (KA, KNDF le PDF) hna he tuni September ni 27 zong ah an i kap tthan.
Hpekhone lei ah thazaang chap in rak lutmi Min Aung Hlaing ralhraang pawl cuannak motor cu Karenni ralkap hna nih, Pinlawng-Hpekhone motor lam cung, Kungsung khua le Ka-te khua pawng ah tuzing suimilam 10:30AM khan an tthuat hna.
Min Aung Hlaing ralhraang pawl cuannak motor hi Kalaw khua in Hpekhone lei ah a rak lutmi an si i motor dihlak ah 40 leng an si, cun a cung cuangmi ralhraang pawl hi 300 hrawng an si, Hpekhone PDF le KNDF nih an tthuat hnanak ah hin ralhraang lei in 20 hrawng an thi.
Ralhraang pawl an thih khunnak cu Hpekhone khua luh lai zawn ah an cuannak motor nih PDF le KNDF ralkap hna tarhmi mine bomb aa lamh sual, ralhraang pawl nih ruahpadamh in meithal an puahnak ah khuami (nu) pakhat kheng in hliamhma a pu, cun khua chung inn cheukhat zong an rawk.
