A luan ciami February thla ni 1, kum 2021 ah Min Aung Hlaing le a ralhraang pawl nih mipi thimmi cozah sin in uknak an rak laak hlaan deuh te ah khan rampi president U Win Myint le rampi ruahnak petu Daw Aung San Suu Kyi hna cu an rak tlaih hmasa hna i tuni caan tiang zong hren le tazacuai an si/
A si nain Pituh Hlutdawt Chairman simi T Khun Myat le Vice President simi Pu Henry Van Thio hna cu ralhraang nih an tlai ve hna lo i president umnak inn le hlutdaw chairman umnak inn ah an um ter peng rih ko hna. Vice president (1) simi U Myint Swe tu cu ralhraang sin ah uknak rian khinh tu a si tiah ralhraang nih uknak an laak le caangka thawngthanhnak an tuah.
A si nain Vice President (2) simi Pu Henry Van Thio le Pituh Hlutdaw Chairman simi Ti Khun Myat hna tu cu tlaih zong an tong lo i president umnak le hlutdaw chairman umnak inn te ah an um ko tiah ralhraang pawl thawnghthanhnak lei ah an pu bik simi Zaw Min Htun nih BBC ah a chim.
Pituh Hlutdaw Chairman simi T Khun Myat hhna cu caan hmaan tein zung a kai peng ko tiah a hawikawm simi pakhat nih BBC ah a chim, T Khun Myat hi USDP member hlun pakhat a rak si i NLD nih teinak an hun hmuh le cozah an hun tlaih tik ah Hlutdaw Chairman dirhmun a hung phan i Hlutdaw ah hin party pahnih (USDP le NLD) kar ah aa tenhmi si.
Ralhraang lei in hlutdaw kuzale hna hruainak in sual puh le le sual phawt tiang an timh nain NLD palai an rak tam deuh caah an hlawh rak tling kho lo, cu ruangah ralhraang nih uknak an hun laak hnu ah ah T Khun Myat tlaih a ton ve lomi hi mipi nih theihfian an duh ngai ngaimi thil pakhat ah a hung cang.
T Khun Myat tlaih a ton lonak a ruang cu thimnak ah i cuh ti lo ding in biachahnak a rak tuahmi ruangah si tiah pension la cangmi ralhraang bawi pakhat nih BBC ah a chim ve. Tuan deuh ah cun T Khun Myat cungah hin ralhraang pawl an hin rak hung ngai ko nain duh paoh in merh khawhmi hlutdaw chairman a si an hun i fian hnu cun zei ah an rel ti lo, cun thimnak i aa cuh lo tik ah an lunghrinhnak a thiang tiah pension la cangmi ralhraang bawi pakhat nih a chimmi cu si.
T Khun Myat a hawi le cheukhat nih cun Naypidaw hlutdaw chairman umnak inn pi in a mah private inn ah aa tthial cang nain Pituh Hlutdaw meeting an auh manh hlaan ah ralhraang nih uknak an laak caah a mah pumpaak private inn in hlutdaw chairman umnak inn ah aa rak tthial tthan tiah an chim, zei ruangah tiah pituh hlutdaw chairman nih hin hlutdaw meeting an auh tthan hlaan lo hlutdaw chairman umnak inn ah a um lai timi phung le phai a um.
Bia halnak ti bantuk cu an tuah ve ko nain a tlaih tak cu an tlai lo i an thlah tthan peng tiah U T Khun Myat hawi pakhat zong nih a chim, T Khun Myat hi Shan ramkulh Kuat Khine pituhsit hruaitu zong a rak ttuan balmi si bantuk in USDP member fek bakmi pakhat zong a si nain NLD cozah chan ah pituh hlutdaw chairman dirhmun a phanh khawhmi hi cu khuaruahhar ngai si ko.
Vice President (2) simi Pu Henry Van Thio zong an tlai lo i president umnak inn pi ah a um ko, inn chung thongthlak bantuk zong in kan tuah lo tiah Zaw Min Htun nih fehternak a rak tuah, a si nain T Khun Myat bantuk in zung tu cu a kai lo i president umnak inn pi tu ah cun a um ko, a ruang cu president zung kha State Administration Council zung tiah thlen a si cang bantuk in le president dirhmun kha Min Aung Hlaing nih a laak cang caah zungkai a hauh ti lonak si.
Inn chung thongthlaak he aa dannak cu um hlei lo, zei ruangah tiah president umnak inn pawl cu a hlaan kan tein security cawng tu khat lak an umnak si, a si nain vice president sinak le thlahlawh tu cu an hmuh peng ko tiah president inn pi he aa neihniammi pakhat nih a chim.
Pu Henry Van Thio hi kum 2020 November thla ah tuahmi rampi thimnak ah teinak cu a rak hmuh ko nain vice president si tthan ding cu aa fiang ti lomi si, a si nain ralhraang nih uknak an laak hnu zongah vice president dirhmun ah cun an chiah peng rih ko.
Pu Henry Van Thio le T Khun Myat hna hi an mah le dirhmun ah ralhraang nih a chiah peng hnanak a ruang cu rampi emergency ca i phung le phai chuahmi pohmah 424 ruang ah a si tiah NUG nih a hrawh cangmi phunghram pi kong a thei fiang tu pakhat nih a chim.
Pohmah 424 ning ah hin president, vice president pa 2, pituh hlutdaw chairman, amyotha hlutdaw chairman hna cu Union Parliament caan a dih cang zongah president thar, vice president thar hna le hlutdaw chairman thar hna an thim khawh hna hlaan chung an dirhmun in an um peng lai ti si, cu te nih cun nihin ni caan tiang a tlaih peng hna tinak si.
