Kan ram cozah a rumnak ding caah si loin kan rampi a rumnak ding caah rian a ttuanmi kan si tiah uknak chut tu le lainawng khuachia simi Min Aung Hlaing nih nizan September ni 22, kum 2021 ah khan Naypidaw khua ah Finance Commission meeting an tuahnak ah a chim.
Ramtthen le ramkulh cozah hna nih hin rampi nih budget a thlakami le phaisa hi mipi hna caah hman a herh, kan nih hi ramkhel cozah kan si lo nain rumnak timi hi tthum in rampi caah mit hmuh kut tongh bak in a langmi le mipi hna caah tthatnak a chuah ter dingmi rianttuan ka herh,
Tu kan rianttuan mi hna hi cozah rumnak ding caah si loin rampi rumnak ding caah kan tuahmi si, kum 2020-2021 ah khan Tax pekmi phaisa a zor bantuk in rampi nih a neihmi sipuaizi rian hna zongah phaisa luhnak a zor ngai ngai, cu ruangah phaisa kan hman tik zongah semrel deuh in hman a hau, cun thilri kan cawk tik zongah Kawlram phaisa Kyat hmang in cawk khawhmi lawng nan cawk lai i ramdang phaisa hmannak hi a si khawh chung in nan i sum lai.
Tender rian kong he pehtlai in kan kut nih a phanhmi paoh ttuan lo ding le zulh ding in sermi phung le phai ning tein rian ttuan ding, ramdang in cawimi phaisa leiba kong he pehtlai in a zin he a karh he cham ding hi mah le ttuanvo aa hngalhmi ram pakhat sinak langhter in tlolh hrim hrim lo ding,
Covid-19 pulrai dohnak ding caah tu thla 6 taangmi budget kum ah hin Kyat 56 billions le a dang dang caah Kyat 100 billion hman ding in timhlamhnak kan nei tiah khuachia lainawng pa Min Aung Hlaing nih cun a chim. A si nain kum 2021 October ni 1 in kum 2022 March ni 31 tiang, thlaruk chung hman ding ah zei zat dah an sangsen timi kong he pehtlai in zei hmanh fiang tein langhter a si lo.
Mipi thimmi cozah chan lio ah khan cun rampi Budget kong he pehtlai in Hlutdaw chungah ceihmainak tuah a rak si bantuk in Financial Commission Chairman simi rampi President bak nih rampi nih hman dingmi phaisa zat cu mipi theih ding in fiang tein an rak langhter.
