Laimi nih kan i bochan mi le philh khawh lo ding mi Rev. Dr. Peter Za Hlun Thang nih chan țim hlan ah dar bang a kan kuai tak cu kan ngaih a chia tuk hringhran ko. A liamtak mi chungkhar vialte cu Pathian nih hngangam daihnak thluachuah cu pe ko hna seh. Rev. Dr. Peter Za Hlun Thang cu India Ram New Delhi i Immanuel Baptist Theological Seminary and College ah BD Degree a lak kum ah kei zong an College ahcun ka kai ve i hi lio ahhin a kong lam ka theih hmasa biknak cu a si ve.
Pu Lian Cir (Bawite Pa) nih Kalaymyo le Tahan Laimi fianrial thlacamnak inn kan ngeih lo kha a lung a rak fak tuk caah a inn hmun cu LCF Kalaymyo sinah man lo in a rak pek. Laimi nih Pu Lian Cir zong philh awk a țha ve lo. A tufale vialte cungah Pathian nih thluachuahnak cu pe ko hna seh. LCF Kalaymyo Committee hnatlaknak in Thlacamnak inn saknak phaisa fund kawl dingin kei mah cu Rangoon ah an ka thlah i Rev. Dr. Peter Za Hlun Thang inn ah ka rak tlung.
A Baibal Sianginn ah Zarh hnih chung Cawnpiaknak a rak ka tuah ter. An nupa in an rak ka Dawt tuk i ka herh mi vialte an rak ka bomh dih. Rangoon khua chungah an ka lenpi ka cam chung vialte an ka zoh khenh an chungkhar cungah hin ka lunglomhnak hi hmurka cun ka chim cawk lo. Rev. Dr. Peter Za Hlun Thang nih cun Keimah cu Ephraim bantuk ka si ve ka Pu nih thluachuah a ka pek tiah nihpah bu khin a rak ka chimh. Keimah kha a lung i nuam seh ti a ka duh caah a si.
Kalaymyo le Tahan Laimi vialte caah fianrial thlacamnak inn sak ding kong ka vun caihpi hna ahcun an nupa in an lung a tho tuk i phaisa tam bik a rak kan pe tu a si. Hi Elijah Thlacamnak inn cu Rev. Dr. Peter Za Hlun Thang te nupa nih an kan sak piak ti u sih law ka palh tuk lai lo. Bia he hla he Phaisa he hi Thlacamnak inn saknak ah a țang bik tu chungkhar an si.
Kalaymyo Elijah Thlacamnak inn a tlamtlinak dingah le hlawhtlinnak kan hmuh khawhnak hnga a kil lung a phumtu cu Rev. Dr. Peter Za Hlun Thang a rak si. Laimi tampi nih hi thil hi kan theih lo dingah a pam tuk in ka hmuh caah tling lo bu pi in ka hun țial mi a si. Cucaah Kalaymyo Elijah Thlacamnak inn a hmunh chung paoh cu Rev. Dr. Peter Za Hlun Thang te nupa min cu philh lo in hmun zungzal ve ko hna seh.
Rev. Dr. Peter Za Hlun Thang hi pumpak in ai daw mi zong kan si ve. Kan Biakinn kan sak lio zongah phaisa a rak kan bawm tu a si. Bu thleidannak a ngei lo. Miphun le tlang, khua thleidannak a ngei lo. Khamhtu Bawi Jesuh Khrih longlong a zoh i ai bochan mi pa a si. A kum rup lo in Laimi kan caah thil țha tampi a tuah hnu ah Pathian nih a țangnem chungah Zungzal i din dingin a kawh cang mi a si.
Isaiah 26:19- Kan mi hna a thimi kha an nung ṭhan lai! An pum kha a nung ṭhan lai. An thlan i a itmi vialte kha an i hlau lai i lunglawm in hla an sa lai. Dapti nih vawlei cu a hrinter ṭhan bantukin a thi ciami cu Bawipa nih a nunter ṭhan hna lai. Rev. Dr. Peter Za Hlun Thang na rianțuanpi hawi Kalaymyo LCF nih cun kan in philh ti lai lo e. Pathian thiang thlarau nih in um pi zungzal ko seh. Cradit: Ephraim Lian Rum, Kalaymyo
