Magwe ramtthen Poke peng, Pin Htaung khua ah nizan September ni 16, kum 2021 zing ah khan Min Aung Hlaing ralhraang phu nih an mah kut tang ah meithal tiang tlaih in an cawlcangh ter hnami piosawtthi phu hna cu mine bomb an tarh lio ah an tarhmi bomb puak in an mah tu pahnih an thi.
Hi kong he pehtlai in khuami pakhat nih nizan zing suimilam 10:00AM hrawng ah khan Pin Htaung khuami piosawtthi phu chungtel simi U Htwat Maung le U Tin Win hna cu mine bomb an tarh lio ah puak sual in hliahma faak ngai in an pu veve, hliamhma an put hnu suimilam pakhat hrawng rauh ah an pahnih in an thi tiah a chim.
Kai Le timi khuami piosawtthi phu hruai tu Maung Oo hruainak in Min Aung Hlaing ralhraang pawl he hmunkhat ah an ttang i tuthla thok ka hrawng ah khan Pin Htaung, Thit Chu Gone, Ywa Thit le Di Doh timi khua hna ah mine bomb tarh ning le puah ning an chimh len hna.
Cun Poke peng chungah hin Min Aung Hlaing ralhraang pawl sin ah thawng petu Dalan le Piosawtthi hna chung in mine bomb puah ruangah a thimi pa 6 an si cang.
