Sagaing ramtthen, Khin Oo peng Tha Naung Gyi khua ah PDF ralkap hna sakhan umnak hmun ah ralhraang pawl a rak hruai hna tu, ralhraang khanhmi khuabawi U Zaw Wan (kum 47) le piosawtthi phu dirh tu Kyaw Thein (kum 50) hna cu nizan September ni 22, kum 2021 zanlei suimilam 6:00PM hrawng ah khan ralhraang pawl he ton biaruahnak an neih hnu an lawinak lam ah an thiruak in an char hna.
Ralhraang pawl he ton biaruahnak an neih hnu inn lei an lawinak lam, Khin Oo le Thin Paung kar motor lam cung, Gone Gyi khua le Poke Ai khua kar ah naam sawhnak hliamhma he an thiruak in an hmuh hna.
Hi kong he pehtlai in khuami pakhat nih “Zaw Wam hi ralhraang khanhmi khuabawi a si i Khin Oo peng PDF sakhan umnak ah ralhraang pawl a rak hruai hna caah PDF sakhan zong ralhraang nih an rak laak, khua chungah ralhraang pawl zong voi 5 nak tlawm lo an rak lut cang”
“Kyaw Thein hi khuanu khuapa (zat mih zat phah) lei in a cawlcaaangmi si i ralhraang pawl he zong aa kawm ngaimi si, khua chungah piosawtthi phu dirh tu zong si i facang le phaisa zong bawmhnak a pek hna” tiah a chim.
Ralhraang khanhmi khuabawi Zaw Wam le piosawtthi phu dirh tu Kyaw Thein hna hi kan mah nih kan thah hnami si i dalan kan thah hnami 26 nak an si tiah King Cobra-Khin U lei nih thawngthanhnak an tuah.
