Sagaing ramtthen, Monywa district, Chaung Oo peng, Kalagyi khua le Kan Zi timi khua ah nizan September ni 16, kum 2021 ah khan Min Aung Hlaing ralhraang pawl nih an luh hnawh hna i hriamnaam hme he hriamnaam ngan he an phomh chih hna ruangah a tlawm bik minung pa 5 an thi tiah thawngpaang theih a si, mah khua pahnih an dirhmun cu a chia ngai ngai.
A luan ciami September ni 15, kum 2021 zan suimilam 9:00PM hrawng ah khan Kalagyi khua pawng ah an bunhmi Mytel Tower tung bomb in an puah hna, nizan September ni 16 ah Kalaygyi le Kanzi khua ah ralhraang pawl an rak lut, hriamnam hme he hriamnaam ngan he an kah hna.
Mah ti an kah hnanak ah PDF mino pa 5 nak tlawm lo an thi, cun PDF ralkap si lomi, khuami sawsawh hna zong thah a tongmi an um, khua le khuami vengtu mino pawl an thah hna, cheukhat an tlaih hna, mah cu Chaung Oo PDF an si tiah Video an zeih rih hna i ralhraang Lawbby pawl nih online cung ah an thlah.
Hmanthlak chungah kan hmuhmi, meithal an put termi zong khi an thah, an ruak zong an i kalpi dih hna, an tlikzaamnak ah khuami chung in thah tongmi zong an um, khuami thah tongmi zong hi tam pah dawh an si ko tiah khuami pakhat nih a chim.
An khua chung inn an khangh piak hna, motorcycle pawl an laak piak hna, khua chung mino an hmuhmi paoh an tlaih hna, a tlizaammi pawl an kah hna, an tlaih hna, an hrem hna i thah tongmi zong tampi an um, mah hi zei dang ruangah si loin an pu Lainawng pa Min Aung Hlaing neihmi Mytel Tower hrawh ruang deuh ah si.
