Min Aung Hlaing la a khuachia ralhraang pawl nih uknak an laak hnu le mipi an kan thah cuahmah lio ah mipi lei ah ttang duh loin khuachia ralhraang lei ah ttang in a cawlcaangmi Zomi Revolution Army (ZRA) le Ka Te hriamtlai phu hna cu PDF-Zoland le PDF-Kalay nih kan phomh cang hna lai tiah nizan September ni 26, kum 2021 ah khan thawngthanhnak an tuah.
Ka Te hriamtlai phu hi India ram cozah a do pengmi hriamtlai phu an si i India ram chungah um ngam lo in Myanmar ram lei kap, Sagaing ramtthen, Tamu peng chung ah khuasa deuhmi an si, cun Zomi Revolution Army hna hi an min bunh cu ttha ngai nain Min Aung Hlaing te nih uknak an laak hnu ah mipi lei ah ttang loin ralhraang do ding in dirhmi PDF tu an doh hna.
Hi kong he pehtlai in PDF-Zoland lei in ttuanvo nei tu pakhat nih “a luan ciami September ni 19 ah khan Hual Ngo PDF phu cungah buainak an rak tuah, Ka Te kong zong mah bantuk tthiam si ko, Tonzaang lei zong ah thawngpaang kan theihmi tete um, duh paoh in kan PDF an tuahto hna”
“Ka Te le ZRA hna sin ah theihternak tuah kan duh hnami cu Tahan sakhan ralhraang nih an rak kah lio ah khan Ka Te hriamtlai phu nih ralhraang pawl hnu lei in an rak bawmh hna, Kalaymyo le Tahan ah ZRA sin ah bawmhnak petu an um, mah hna zong cu an min cazin kan laak dih cang hna, Kalay Kabaw lei zong ah Ka Te hriamtali phu le ZRA an lut timi kan theih” tiah a chim.
PDF-Zoland le PDF-Kalay hna hi ral do tti ding in hawikawmhnak a tuah cangmi an si bantuk in Tonzaang peng, Tedim peng le Kalay Kabaw hrawng ah ralhraang he pehtlaihnak neimi phu le pumpaak minung an konglam vialte an laak khawh dih cang hna, a rauh hlaan ah an phomh hna lai.
ZRA nih hin ramri zawn ah hmunhma khuar in raltuk training cawngmi PDF-Zoland sakhan hi voi 2 bak te an luh hnawh hna i Hualngo PDF ralkap hna zong voikhatnak tlawm lo an hrem cang hna, Ka Te hriamtlai phu hna zong hi Tamu peng chungah ralhraang pawl he pehtlaihnak neih in ralhraang lei ah an ttang tiah Tamu PDF lei nih ralrin peknak ca an chuah ve.
