Sagaing ramtthen, Pale peng, Kanh Dongh neme Min Aung Hlaing palik sakhan pakhat cu nizan September ni 21, kum 2021 zanlei suimilam 4:45PM hrawng ah khan mei in an khangh tiah khuami hna sin in thawngpaang theih a si.
Hi kong he pehtlai in Pale peng chung hriamtlai phu chungtel pakhat nih hi ralhraang sakhan mei kan khanghnak a ruang cu ralhraang pawl nih kan peng chungah hmunhma la kho hna hlah seh ti kan duh caah si, tu ah kan khanghmi sakhan ah hin ralhraang 50 hrawng thaizing in chiah an timh hna timi thawngpaang kan theihâ tiah a chim.
Pale peng chung Kanh Dongh timi ralhraang sakhan hi Pale myoma palik sakhan dih in a ttha bik sakhan si, Myoma palik hi a ttha bik si i a pahnihnak ah a ttha bikmi hi tu ah hriamtlai phu nih an khanghmi sakhan hi si, uknak an laak hnu ah an himnak ding caah tiah sakhan ah rak ummi ralhraang pawl cu Pale khua chung myoma ralhraang sakhan ah an chiah hna.
