Tuni September ni 16, kum 2021 ah Chin ramkulh Kanpalet peng, Cinduai khua ah thazaang chap ding in a vun rami Min Aung Hlaing ralhraang pawl cu Magwe ramtthen, Laungsi le Chin ramkulh ramri zawn ah Chinland Defense Force (Kanpalet) in ralkap hna nih an tthuat hna i ralhraang lei in pa 7 an thi, hliamhma pumi zong an tam ngai.
Chinland Defense Force (Kanpalet) in pasal ttha ralkap hna cu him le bawm tein hnu lei ah an sip tthan kho, mah vial hi an mah CDF (Kanpalet) lei in thawngpaang an thanhmi cu si.
Mipi lei nih fehter a si rih lomi le CDF lei nih an thanh rih lomi kah dohnak thawngpaang, hmunhma ti bantuk hna hi Social Media cungah rak kan thlah piak lo ding in theihternak kan in tuah hna tiah CDF-Kanpalet lei nih an vun thanh chih. Tu kan vun lehmi hi cu an mah CDF lei zong nih ttha tein an thanh ko cang caah kan vun leh chinmi si.
Thawngpaang dang relchap a zuammi caah: tuni September ni 16, kum 2021 zanlei suimilam 3:30PM hrawng ah khan Magwe ramtthen, Saw peng in Yaw peng lei ah a rak kaimi ralhraang 100 tluk phur tu motor thluan cu People’s Defense Force (Saw) in pasal ttha ralkap hna nih Saw-Kangyi motor lam cungah mine bomb in an tthuat hna i ralhraang lei in a tlawm bik pa 10 an thi tiah PDF-Saw lei nih thawngthanhnak an tuah.
An mah PDF-Saw lei in cun ralhraang motor bomb an puah dih hnu ah him le bawm tein hnu lei ah an sip kho tthan, hi motor lam cungah hin Min Aung Hlaing ralhraang pawl le PDF-Saw ralkap hna kar ah zei tik caan paoh ah kahdohnak a chuah khawh ruangah mipi lei nih ralring deuh tein chawhleh ding ah PDF-Saw lei nih ralrinnak an pek hna.
