Tulio kan kawlram thawngpang cu ruah lengmang ah lungfak taktak a si. Kawl ralhrang rual nih nichiar ram chung mipi ankan thahnawn cuahmah lioah khat te lei in Covid-19 pulrai nih nikhat chungah minung tam tuk nunnak a rak lak ve fawn.
Tulio kan kawlram cu kan theih dih cio bangin Covid zawtnak in nikhat chung ah minung tam tuk an nunnak a liam caah ram chung ram leng um chinmi/ Laimi lungrethei in kan um lio caan a si. Tuni ah Kalay Myo Lairawn Mino News timi nih an rak post mi Video nih online chung mipi mitthli a tlakter dih.
Ram thumnak ah a um mi nu pakhat cu khua lei ah a chung le Covid-19 zawtnak in a zaw i oxygen an pek cuahmah lio mi an chung le he an ni chawn i cu vodeo call in an ni chawnh cuahmah lio ah a nunnak a dih ruangmang mi hmuh cu thinlung nih a celh hrimhrim lo.
Tulio kan ram dirhmun cu ralhrang hna nih uknak an lak ruangah phaisa kuat khawh ko zong ah hlan bantuk in duhning bang in kuat khawh le cawlcangh khawh a si ti lo. Mah caah cun chungkhar tampi cu Covid-19 zawtnak in an zaw i an zual tuk ko zong ah oxygen pek awk nei lo in nunnnak liam tampi an um.
Phaisa an va ngei ko zong ah oxygen la ding in a kal mi mipi hna cu ralhrang nih meithal in an kah chin fawn hna caah duh bang in zei hmanh an tuah kho ti lo. Tu lio kan kawlram dirhmun zoh ahcun zeite hmanh khi khuaruah khawh a si lo.
