Min Aung Hlaing te phu nih Myanmar ram chungah thahnawnnak an tuahmi dohnak ah NUG nih a hruai hruaining le rianttuan ning hi kan cohlaan tiah US Department of State in Connselor simi Derek H. Chollet nih a chim. NUG nih D-Day a rak puan ka ah khan cun American lei nih hin an hnatlak lonak kong hna an rak langhter ngai.
Myanmar ram chungah democracy a chuah tthan khawhnak ding caah tiah National Unity Government (NUG) le American Department of State lei in Counselor simi Derrek Chollet hna cu biaruahnak an neih bantuk in UN Special Envoy ttuan liomi U Kyaw Moe Htun he zong in ton biaruahnak bak an nei tiah Yangon khua hrambunh US Embassy zung lei nih an thanh.
“US Department of State lei in Counselor simi Derrek Chollet cu UN Special Envoy ttuan liomi U Kyaw Moe Htun he tuni ah New York khua ah ton biaruahnak an neih bantuk in Myanmar ram NUG cozah lei in ttuanvo hna he zong online cung in biaruahnak an nei.
Mah ti biaruahnak an neihnak ah cun Myanmar ram chungah a rang bik in democracy a chuah khawhnak ding caah upadi nih a huap mi ram a chuah ding hi a biapi tukmi si tiah ceihmainak an neih bantuk in tlangcung hriamtlai ph uhna le biaknak lei hruai tu hna siseh, nuhrin covo kong te hna zong ceihmainak an nei, cun Myanmar ram mipi hna nih an pah cuahmah mi Covid-19 pulrai dohnak lei kong zong an ceih chih.
Min Aung Hliang te phu nih ttihnung le rapthlaak tak tak in mipi thahnawnnak an tuahmi cungah NUG hruainak in mipi nih an dohmi hi kan cohlaan, cun Myanmar ram hi democracy lam cung ah a rang bik in a phanh khawhnak hnga rianttuan tu hna dihlak caah American lei nih kan si khawh chung in bawmhnak kan in pek hna lai tiah Derrek Chollet nih cun a chim.
