Minung 54 million hrawng um nak kan kawlram pi cu ralkap nih kum 70 chung hrawng an kan uk hnu in NLD cozah nih teinak an vun hmuh i kum 5 dengmang an vun kan hruai ve tthan i a chung umpi zalong taktak in kan um kan vu ti hnu 2021 fabuary 1 ah khan ralkap nih uknak an lak tthan.
Mah ruang ah cun ralkap uknak duhlo in kawlram mipi cu heh tiah sandahpiah nak in an hung cawlcang colh. Ralkap nihcun hlan lio i aana an rak lak tawn i mipi meithal he an rak hrocer hna i dai dup i an rak um bantuk khan an um tthan an zumh caah heh tiah sandahpiah mipi cu meithal in an puah hnawh hna.
An rak i ruahnak ning bantuk cu an rak si naisai ti lo ai, meithal thawng theih i zam tak cu chim lo, duhlo nak an langhter ning cu a zual chin lengmang, mah ruang ah ralkap lei nih zeiti tiawk an theih ti lo caah sualnak nei lo mipi bak cu meithal in an kah thih hna, heh tiah an tlaih hna.
Ralkap nih ningcang lo tuk in mipi sandahpiah an tuk an kah hna ruang ah Kalaymyo mino pawl an thinhang an ni sum kho ti lo i KCA tihmi army an dirh i heh tiah ralkap cu an doh hna, mah hnu tlawmpal ahcun heh tiah tlangcung khua kip nih mah le i runven nak ding ah tiin hriamtla phu an hung dirh thluahmah ve.
Cu lawng hmanh si lo in NUG tihmi caan karlak cozah thar tiang an hung dirh ve. Caan karlak cozah thar an dirhmi chung i rianttuan tu ah kan chin mi tiang an hung i tel kho ve. NUG cozah thar nihcun nizan nai teah PDF tiang an hung dirh colh fawn.NUG Deputy Minister of Defense nu cu media nih biahal nak an tuah.
Mah biahalnak an tuahmi cu, cozah thar nih hin ralkap zeizah hrawng dah nan ngeih tiah an hal i, a lehmi hna cu, kan ram mipi hi ti(water) an si, kan mah mipi kilveng tu pawl hi nga(fish) kan si, “Ti” a um nak poah ahcun “Nga” cu an um ko lai tiah a leh.
A ti tthan rihmi cu minung 50 million le minung ting hnih fai hrawng raldohnak ahcun ho te dah tlu te lai tihmi cu nan i fiang ko lai tiah a leh hna. A chim duhmi cu kan ram mipi khi cozah thar i kan ralkap longte an si a si duhnak khi a si ko. Israel miphun cu an zapi tein ralkap an si tiah an rak chim he khin ai lo ngai mi a si.
