Shan ramkulh chaklei, Lashio peng, Nam Ton timi khua le Pong Mon khua kar ah nizan September ni 20, kum 2021 zanlei suimilam 3:00PM hrawng ah khan Min Aung Hlaing ralhraang pawl le tlangcung hriamtlai phu hna kar ah kah dohnak a chuak tiah thawngpaang theih a si.
Kaphnih kar kah dohnak a chuah lio ah Muse lei in a rak ttummi Motorcycle, motor hmemi le motor nganmi vialte Nam Ton khua luh lai zawn lamkam ah an dir ter dih hna bantuk in Muse lei ah kai aa timmi motor vialte zong an dir ter dih hna.
“Zei hmanh kan ei rih lo i kan rawl a ttan ngai, an i kahnak a rau pah cang fawn, bomb kah thawng hi caan caan ah kan theih pah” tiah khual tlawngmi pakhat nih a chim. Suimilam pakhat chung hrawng an i kah hnu ah an kham hnami motor pawl cu an kal ter tthan hna i Lashio lei in ttumnak Nam Ton khua ah ralhraang 50 hrawng an um.
Khuatlawngmi hna le khuami hna nih cun tutan aa kapmi hi Min Aung Hlaing ralhraang pawl le Northern Alliance ralkap hna an si tiah an chim. Cun nizan chun suimilam 12:55PM hrawng ah khan Shan ramkulh Mungku khua lei ah a rak kaimi ralhraang pawl ral tuknak ttheng pi cu tluang tein a phanh khawhnak hnga tiah ralhraang pawl nih lamkam bak in an cawngh i tlerhnak ah tiin bomb le meithal zong an puah chih.
Nizan an i kahnak ah hin kaphnih lei in hliamhma pumi le a thimi an um le um lo theih khawh si rih lo, Shan ramkulh chaklei Lasio peng le Muse peng chungah hin ralhraang pawl le TNLA, AA, MNDAA hna aa fonhmi tlangcung hriamtlai phu an i kap ngai, cun KIA he zong tu le tu ti awk in an i kap.
