Kan theih dih cio bang in Myanmar Idol season 4 Wild Card Winner pakhat a si mi Naga miphun kan unau pa Takhun Kyaw cu Myanmar idol a dih hnu in chunni tiang mipi nih an uar ning ai dang hlei lo ti u sihlaw kan palh lem lai lo. Myanmar Idol season 4 an dih hnu in a lar chin lengmang.
Takhun Kyaw mipi nih an uar tuk nak cu a aw tthat hlei ah a nunzia aa dawh tuk mi ruang ah khin mipi nih an uar khunnak le thazang an pek khunnak a si. Myanmar Idol season 4 an dih hnu in hla a saknak i a hmuh phaisa tampi cu mi sifak hna sin ah a ti khawh tawk in a pechan zungzal tu a si caah mipi lungthin a lak khawh khunnak a si.
Takhun Kyaw nih sii lei a cawngmi sianghakchia pakhat cu a damlo nak a zual tuk caah Operation ding a si i, phaisa an ngeih lo caah lungrethei taktak i an um lio ah Operation tuahnak ding kyat ting 150 bak bomhnak a pek tiah theih a si. Bomhnak a pekmi sianghakchia pate min cu Ko Khanh Min Thaw tiah an auh mi a si.
Mah nghakchia pate cu a kal(Kidney) thlennak ding ah phaisa ting 150 a herh caah a chungkhar le caahcun zeiti hmanh in neih khawhnak ding lam a um lo caah a rauh hlan ah an fape te cu a thi ding dirhmun ah a dir timi an vun ruah ahcun an celh hrimhrim lo. Cu ti lungrethei taktak i an um lio ahcun tu bantuk in Takhun Kyaw nih bomhnak a va pekchanh hi a si.
