Myanmar ram Covid-19 third wave kan tih a thawh thumna inkai chhawn rapthlakzia leh thihpui tam tawhzia kan hre theuh awm e. Tunah pawh hian positive tam zawk chuan oxygen an mamawh tlangpui zel a, mipui positive te nunna hnar ber Oxygen lah chu mipui ban phak lohin a khuahkhirh hmiah hmiah zel bawk.
Min Aung Hlaing-a hian a ram chhung mipuite nunna hi engtianga nasa suat nge a tum i lo thlir ang. Thla khat chhung leka Covid-19 vanga thi zat chu sawi loh July ni khat atanga vawiin ringawta thi zat ringawt pawh hi rapthlak/ awihawm lo khawp a ni. Tahan Kristian thlanmual phei chu siam belh a nih zel bakah a hmun pawh zauh zel a la ngai ngei ang. Heng mithi tam zawk te hi Covid-19 positive, mahni ina tuar hlum thak te an ni.
July 12, 2021 (Monday) tlai khan hel sipai chanchin puangtu MDW leh MRTV te chuan ram sorkarna chelhtu ang maiin Covid confirmed case 5014, thi zat 89 tiin a rawn tar lang a, hei hi anmahni sipai damdawi in leh an Quarantine Center (sakawr in anga ṭawp) a case an hmuh te list chauh a ni. Mahni ina in enkawlna nei lo leh oxygen tlakchham avanga thi te list a tarlang hauh lo thung. An tarlan pawhin number tlem thei ang berin an tar lang thin.
Myanmar ram pumah Kalaymyo-Tahan hi Covid-19 tuar nasa ber leh thihpui tam ber an la ni a, heng positive case leh thi zat pawh hi a tarlang hauh lo bawk. Ram puma Covid-19 do kawnga hmalatu ber anga lan tumin khawvel bum a tum mek a, chutih mek lai chuan Positive te mamawh ber pakhat Oxygen erawh mipuite ban phak loh turin ram puma Oxygen siam chhuahna (Generator company) te chu khar tur leh mipuite pe chhuak lo turin thu a chhuah bawk (an thu chhuahah chuan vawiin tan Oxygen a theih loh tih a ni).
July 10 khan Min Aung Hlaing chuan Yangon khawpui chhunga Oxygen khawl (company) te hnenah mipui tumah Oxygen leitir lo turin thu a chhuah bawk. Hel sipai Spokesmen, Zaw Min Tun chuan, “Oxygen hi mi mal lei leh thun phal a ni lo va, dawmdawi in leh Health Department lam tan a ni ang. Mamawh tawp khawk chuan mahni bial, khua, ward chhunga Health Department-ah emaw, Hospital-ah te kalin doctor te phalna (Recommandation letter) lak hmasak tur a ni a, hutiang phalna lehkha nei te chuan a thun theih ang. Oxygen chungchang hi Online lamah thu dik lo a thang nasa a, hei vanga mi mala thun kan khap ta a ni” a ti.
July 11, 12, leh 13 chhung hian Damdawi ina in admit phal loh, Oxygen mamawh si, Online kaltalnga Oxygen lei theihna zawnga mi dang puihna dil hi an tam em em a, zing var rual atanga tlai, zan thlenga nghak chhuak zo lo, thenkhat an hun a thlen veleha an hmangaih Oxygen mamawh ten an liamsan tak thi hi tam tak an ni.
Heng thil thleng te hi Min Aung Hlaing leh a pawl te hian an hre lo em ni? Hre teh reng mai, he thil thleng hi an duhthusam a ni zawk. Kan sawi tumah i lut ang aw ni. A chunga an spokesmen Zaw Min Tun-a thusawi khi han chik la, an thil tum chu chiang takin i hre ngei ang. Mipui mamawh, Mask, PPE, Damdawi hrang hrang te chu chhuanlam fahrah tak siamin ram pawn atang lak luhna kawng a khar vek (an mahni chauhin an la lut) a, ram pawn mai ni lo ram chhunga Oxygent siam chhuahna khawl (company) zawng zawng a thuhnuaia dah a tum vek bawk.
Heng Covid-19 dona hmanrua, PPE, Mask, Gloves, damdawi leh Oxygen te hi hel sipai Military Junta chuan pumpilh vek a tum a, mipui hnenah engmah thleng thei lo turin luh theihna zawng zawng a khar ang. Tichuan, anmahni puala din, Quarantine Center, Damdawi in, Health Department ah chauh lei theih, lak chhuah theih leh dawn theih turin hma an la ang. An thuneihna kalha, kawngzawh a, anmahni dotu mipuite chu anmahni tel lo chuan thih chauh an hmabak a, a tawpah kan tanpuina ngiatin an la rawn tlu lut ang tih hi an tum lian ber a ni.
Chu chauh a la ni lo, mi thiam tam zawk chuan “Covid-19 hi China siam chhuah ngei a ni a, a siam chhuaktu ramah chuan he hri avang hian eng buaina mah an nei lo. Khawvela Covid-19 vanga buai lo awmchhun chu CHINA hi a ni tih a ni a. China puihna kaltlangin Min Aung Hlaing hian, he Covid-19 (Chemical Weapon) hmang hian an thuneihna dotu mipuite a suat ang a, he thil hmang hian mipuite chu an hnena tluk luh theih dan kawng an zawng ang. Silai hmanga mipui a thah leh chuan an Crime a nasa zual dawn avangin Covid-19 hmangin a ram mipuite a bei ta a ni” tih a ni.
An spokesmen Pa Duma sawi khi han sawi zawm leh ila, “Oxgygen hi mamawh lo tan leina tur chhan a awm lo. Zing chhun zana Oxygen bur khat tal pawh chan loh hlau te hi in lama an hmangaih tu emaw mamawh tak, thi thei reng an awm vang a ni. Mipui zingah lo inlei khawlsa an awm hek lo. Mamawh lo ten, mamawh te neih theih dan tur kawng hrang hrang kan dappui zawk a ni. Mipuite hi thi se, buai vek sela, he Spring Revolution hi chhunzawm thei lovin buai mup mup rawh se tih hi an tum lian ber a ni tih July thla chhung hian a chiang ta vek a ni. He Covid-19 hi an hmanrua tha ber a la ni tih hi an pha thei lo vang.
Covid-19 third wave hi Political chemical weapon atan an hmang a, mipuite an thih mup mup nana an thil tum plan an hman tak avang hian mipuite chuan damna zawngin hel sipai te damdawi inah an la tlu lut ang a, khawtlang a buai mup mup ang a, spring Revolution hi a lo tlu chhe tawh ang tih hi an plan hnuhnung ber a ni ta. He Virus (Pandemic) hmanga China-in khawvel a suat ang chiahin Min Aung Hlaing chuan a ram mipuite a suat mek a ni.
Mipui zingah pawh, “Covid-19 hluar laia kawng lo la zawh teh, mawl hlawm lutuk, atah pawh chin tawk awm, thi vek rawh se” ti kan awm der tawh. Kawng zawh te hian virus kai an hlau lo a ni hauh lo. An thil tih hi an chiang a sin. He Spring Revolution tana an chhe chham te hi kan hriatpui lo a ni. Thih thlengin kan ti a, tunah Covid-19 avangin Spring Revolution pawh thil tul lo, mimawl hna kan ti der tawh.
Chuvangin mipuite u, kan kawng zawh hi i hrechiang ang u. Covid-19 pawh fimkhur takin kan do tur a ni a, Spring Revolution hi kan hlamchhiah tur a ni lo. Kan thluak hi min suksak mek a, chhel taka kan din ngheh a tul. February ni khat, thuneihna an lak ni kha kan la hria em aw? Khatih lai pawh khan Covid-19 kha a kiam hauh lo. Mahse thih ngamin kan do let a nih kha. Kei he thuziaktu ngei pawh hian, Covid-19 avangin ka thian tha, ka chhung te ka chan a sin. Mahse mipui kawngzawh leh Spring Revolution activists te hi demna chhe te mah ka nei lo.
Mizoram, ram buai lai khan vai sipai ten kan Mizo nula, hmeichhia an pawng sual a, an that a, an neih an chhuhsak a, mahse Mizo mipuite khan hnam sipai MNF sipai te kha demna an nei hauh lo a sin. Keini chu hei Min Aung Hlaing-a dem a hnekin mahni kan indem der tawh chu a nih hi. Kan kawng zawh hi i chiang ang u, thihna meuh pawh lo thleng se kan tih tawh kha. Covid-19 ata kan him theih nan leh, he Spring Revolution hi a tawp thleng i support zel ang u. Crd: Edward C.L.Mawia
