Thawngpang cu a si lo nain, a zoh huam mi hna caah thazaang petu a si ka zumh ruang ah a video tawite he ka rak post mi a si. Cheu khat caah cun zei huaha lo zong a si kho men ko nain cheukhat caah cun nitin kan tuah ttuannak ah thazaang akan petu pakhat a si hrimhrim lai tiah ka zumh ko.
India ram khua pakhat ah fifak pate pakhat cu siangin kai pah in zing chiar te tadinza( News peper) a sem i mah hnu cun siangin kai ah ai thawh tawn, hmanh sehlaw a siangin luh caan ah a phak khawh tawn loh caah an saya pa nih zing chiar a kut ah fung in a tuk tawn.
Cuti fung in a tuk lio ah a siang kai pi hawi le nihcun heh tiah an rak nihsawh tawn, siangin kai nak ding a neih hlei lo caah lungdong lo tein zing chiar siangin kai hlan ah News peper cu a sem i, mah hnu cu siangin cu a va kai ve tawn, zing chiar a tlai peng ruang ah an saya pa nihcun zing chiar a kut ah fung in a tuk zungzal.
Vawi khat zingka cu an saya pa cu zingka ah exercise la ding in mawtaw lampi ah khin a tli, cuti a tlik cuahmah lio ahcun a sianghakchia pa nih News peper a sem cuahmah ko mi cu a hmuh i, a hnu lei te khin a zulh i a zoh peng, cu pate nihcun inn khat hnu inn khat cun a sem lengmang i mah cu hnu cun siangin kai ah ai thawh kha a hmuh.
Zing khat cu News peper a sem dih hnu cun siangin cu a va phan tthan i, a hawi le nih an saya pa nih a tuk tthan ttheu lai tiah zei rello nawn khin an rak zoh lio ah an saya pa nih cun siangin khan chung a luh bak khin a rak kuh in an saya pa cu a mitthli a tla ruangmang.
Zei bantuk thil kan tuahnak paoh ah hin hi pate bantuk in lungdong lo tein a tuahtu minung nih teinak kha an hmuh tawn, kan biak mi kan Pathian zong nih lungdong lo tein a ttuan lengmang mi minung khi thlawchuahnak a pek khun hna. Teinak kan hmuh khawh nak ding ahcun hi pate bantuk in lungdong lo in kan ttuan a herh.
