Nizan in nihin ni tiang ralhrang hna nih Mindat khuapi cu cunglei he tanglei he hriamnam ngan in heh tiah an kah hna caah CDF-Mindat mipi runvengtu ralkap cu hnunglei ah an kir tiah theih a si. Tuzan suimilam 8:30pm hrawng ah khan ralhrang kut in Mindat hua mino minung pali an nunnak a liam tiah theih asi.
Mindat minung tlawmte um nak bak cu ralhrang thangzaang tam taktak le hriamnam tampi he an fuh mi ruah ah khin cun ngaihchia taktak bak a si. Mindat khua mi nih an chim ning ahcun nizan le tuni ralhrang nih Mindat an kahdoh ning cu KIA, AA, KNU an dohnak hna nak hmanh in an hriamnam hman a turu deuh tiah an chim.
Ralpi pakhat ralkap nih khuapi fate minung hna hriannam ngeihmi dihlak i vun kah ko cu saram lungthin hmanh an keng ti rua lo. Tuzan tiang ah khan Matupi myo le Mindat myo ka dangdang ah ralhrang minung 1000 reng bak nih an luhhnawh hna tiah theih asi. Ralhrang hna nihcun hriamnam ngan he an kah hna long hmanh si lo in lam hlatpi khin Sniper bak in an kah hna tiah khuami nih an chim fawn.
Tuzan suimilam 8:30pm ah khan Chin World nih a langhter ning ahcun CDF-Mindat lei in minung 4 an nunnak a liam i minung cheukhat hliamhma an pu tiah khuami nih an chim. Tuni Mindat kan unau hna ralhrang nih an den hna ning cu lung a fak bak ko.
