May 1-31 tiang ah Myanmar ramchung ah hmun kip ah SAC ralhrang le an hnuzul pawl minung 577 an thi, tiah BAP nih cazin a lakmi a langhter.
Ralzam ah a thimi SAC ralkap pawl lawng si loin SAC ralhrang hnuzul khua/sang uktu le dalan pawl zong an relh chih hna.
May thla chung lawng ah 577 an thi i, a dang minung 378 hi hliamhma an pu hna. Ni khat ah minung 18 rate in an thi.
Cun, May thla chung ah peng kip le khua kip ah a cangmi mipi rungvengtu ralkap bu, tlangcungmi hriamtlaitu hna le SAC ralhrang karlak kahdohnak voi 289 a chuak.
Abikin, Kachin, Kaya, Kayin, Chin, Shan, Magwe ramtthen le Sagaing ramtthen pawl ah kahdohnak a tam i, cuka hmun pawl ah cun SAC ralhrang a thimi an tam hna.
Cun, Yangon tibantuk Kawlrawn chung khuapi pawl ah uknak lei zung le dalan inn bomb puah a tam i, thah a tongmi khua uktu/sang uktu le dalan pawl an um len.
A cunglei May thla chung SAC ralhrang a thimi le hliam a pumi cazin hi Myanmar ramchung zumhtlak Media pawl nih an tarmi Data pawl cherhchan in BAP nih a lakmi a si.
Nizaan May 31 i, Kayin ramkulh, Demoso peng, Kungtha khua kahdohnak lawng ah SAC ralhrang 80 hrawng an thi.
Atu bantuk in SAC ralhrang lei a thimi an tam tuk nain SAC thawngzamhnak Myanmar Alin le Kye Mon tibantuk ah a thimi milu fiang in langhter a um ballo.Credit:The Chin Journal June
Relchap: Aung San Suu Kyi le President Win Myint atu an umnak in, hmundang, mizeihmanh theih lonak hmun ah Ralhrang pawl nih an thial hna, an nun himnak caah thinphang in kan um, an him lo tiah NUG Cozah nih cathanh an chuah mi ah an langhter.
NUG Cozah nih cathanh an chuah mi ah “Ralhrang nih Aung San Suu Kyi le President Win Myint biaceih zung, a voikhat nak bik an chuah pi hna lio thilcang, Ralkap nih hman an thlak hna i mipi lemsoinak le hlennak ah an hmanthlak an hman, pumpak limhang an hnorsuan zong a si i Upadi ning loin an cawlcangh a si timi sual phawtnak zong an langhter chih”.
“Ralkap Council, Ralhrang phu mi Aung San Suu Kyi le President Win Myint cu ralhrang biaceih zung ah an chuah pi hna. An hmanthlak cu online ah phozar in mipi lemsoinak le hlennak ah an hman. Pumpak cozah le limhang hnorsuan a si. Atu zong Aung San Suu Kyi le President cu a hmasa an chiah hnanak hmun in, a dang mizei hmanh theih lonak ah an thial hna. Cu caah an himnak le damnak caah kan lungre a thei” tiah an langhter fawn.
Cu lawng si loin Ralhrawng nih an tlaih mi hna chung in nihin tiang an min theih lomi, an chiah hna nak theih lomi minung tampi an um rih. Ralhrang nih minung tamtuk a thah hna, tlangcung hmunram ah tuksapur in kahdohnak Lainawnnak an tuah. An tuahsernak vialte hi an mah nih an tuar tthan ve lai. An tuah mi thil cung ah tuanvo laknak an ngeih hrimhrim khawhnak ah NUG Cozah kan i zuam cuahmah tiah an langhter chih hi asi.Cre:Zaitha pa
