CDF-Hakha le ralhrang hna cu a tanglei ka vun langhter nak hmunhma hna ah khin May 18-19 ah khan kahdohnak an nei i mah kahdohnak ahcun ralhrang lei in minung 7 an nunnak a liam i minung 19 hliamhma an pu tiah theih a si.
CDF-Hakha ralkap lei in cun hliamhma pu mi kan um lo tiah an mah CDF-Hakha page ah an vun langhter. 2021 may 18 zanlei suimilam 4-5pm karlak an i kahdohnak an nei i a voi khat nak bik an ni kah nak cu Hakha le Thantlang karlak ah a si i, ralhrang lei in minung pakhat an thi.
A voi hnihnak cu Hakha Tirih 6 lam lansung ah a sii, ralhrang lei in minung pali an nunnak a liam i atlawm bik minung pakua nih hliamhma an pu tiah theih asi. A voi thumnak cu Hakha le Kankaw lam ah a sii, ralhrang lei in minung 3 hliamhma an pu.
2021 may 19 nizan ah CDF-Hakha le ralhrang an ni kahnak hmun le hma pawl cu a voi khatnak ahralhrang hna cu minung 70 bak Matupi in an rak rat nak ah anmah le mah kar ah kahdohnak a chuak i minung pathum an thi i, a tlawm bik minung panga hliamhma an pu.
A voi hnihnak cu CDF-Haka saikawl 30 nak tam deuh cu ralhrang nih mei nih an khangh piak dih hna. Tuchunni tiang an ni kahnak tete zoh tik CDF-Hakha lei dirhmun ttha deuh ah an dir kho peng rih tiah theih khawh a si. Crd: CDF page
Relchap- Loklung Khua Pawng I CDF-Hakha Le Ralhrang Kahdohnak Kongah Biafiang Theih A Si Cang. Loklung khua pawng i CDF-Hakha le rallokap kahdohnak ah rallokap lei minung 5 an thi tiah theih a si. Hi kahdohnak hi May 18 ah a ummi a si.
Hakha in meng 7 hrawng a hlatnak Loklung khuapawngah CDF-Hakha chikhat umhmun an khuarnak cu Hakha khuachung rallokap 266 nih hriamngan in an kan kah hmasa tiah CDF-Hakha chungtel pakhat nih a chim.
Hriamngan in an kah hna hnuah rallokap 5 hna nih CDF umnak lei cu an fuh i cu hna cu CDF nih Lai meithal in an rak kah hna i an dihlak in a hmun ah an thi tiah theih a si.
“Hriamngan in biatak tein an kan kah, asinain vanthat ah kan i zukphiak kho. Anmah lei 5 an thi. Kan thilri le saikel pawl mei in an khangh hna” tiah CDF chungtel pakhat nih a chim.
Hriamnam an hmanmi aa dan tuk caah CDF lei cu an kah hna in hnu an tolh colh. Loklung khuapawng kahdohnak ahhin CDF lei 100 an si i rallokap lei hi 100 renglo an si lai tiah CDF chungtel pakhat nih cun a chim.
Tutan kahdohnak ahhin CDF lei cu hliamtuar le a thimi an um lo. Rallokap nih hriamngan in an kah hna caah khuami cu an thin a phang i khua chuahtak in ramlak le khua chingchang ah an zam, an i dor tiah theih a si.
Hiti a zammi hna lakah kum 5 tang ngakchia 50 leng an i tel, cun May thla chungah nau a ngei dingmi naupawi 4 zong an i tel.
Rallokap nih hin zanlei suimilam 7 tiang hriamngan in an kah hna i cu hnuah thlacamnak hmunah hmunhma an khuar tiah theih a si.
Loklung khuachungah cun khuami pakhat hmanh an um ti lo, rallokap lawng an um. Rallokap nih cun an duhnak inn cu innkhar an boh i a chungah rawl an chuang tiah theih a si. Crd: TCP
