Uknak le nawl neihnak aa hruh pi tukmi Lainawng khuachia pa Min Aung Hlaing ruangah uknak an laak ni, a luan ciami February ni 1, kum 2021 thok in tuni caan tiang ah ralhraang thimi an tam ngai cang, zei tluk an thih zong ah cunglei an pu le hna nih hin Mytel Tower tung pakhat tluk hmanh ah an rel hna lo.
Ralram ah thimi an ralhraang pawl ruak cheukhat cu lamkam ah an pon hna, ti luannak ah an thu men, khangh le phum te hmanh an tong lo, hi tluk in cunglei an pu le nih zei te hmanh i an rel hna lo bu zongah mipi lei ah ttang duh lomi ralhraang pawl cu ralram ah kuat le thlah thluahmah an si.
Tu ah cun an thazaang a hung der ngai ngai cang caah ralhraang pawl an nupi le an fanu le tiang khua chung ralhraang sakhan an cawngh ter hna, cun kan hnu lei ah khan a herh ah cun ralhraang nupi le zong ral doh a si lai tiah nawl an rak chuah cang bantuk in ralhraang ah luh ve ttung lo le an pasal le an pa le pawl ralhraang an si ruangah an nupi, an fanu le an fapa le hna zong uniform an pek cuahmah cang hna.
Kan hnu lei ah “Sal cawk tik ah man pek hau loin belh,chap mi ralhraang nupi le dirhmun” timi tlaangtaar in kan rak ttial cang bantuk khan an pasal le maw hringtu an pa le ralhraang an si ruangah an nupi, an fanu le an fapa hna zong cu man pek hau lo (thlahlawh pek hau lo) in ral doh ter an timh cang hna.
