Ralhrangbu Hriamngan Ruangah Namha khua chungkhar pakhat, Minung 4 an nunnak a liam Shan ram chaklei Muse district chung Mungkoe peng Namha khua inn pakhat cungah tuzing August 29 zinglei ah hriamngan kuan a tla, a puah ruangah chungkhar pakhat, minung 4 an nunnak a liam.
An chungkhar hi minung 4 an si i, an dihlak an thi dih tiah theih a si. Namha khua hi inndong 200 hrawng an si i, Palong miphun hna umnak khua pakhat a si. Nizan zinglei ah KIA le ralhrang an i kah hnuah zanlei zongah KIA, MNDAA fonh hr Mungkoe khua in meng 5 hrawng a hlatnak Konglung le Mansa kar Mankhom khua ah an i kap than.
Ralhrangbu lei tatyinhmu tel in tam ngai an thi, hriamnam zong tam ngai an lak piak hna tiah theih a si. Mah hnuah Namha khua ah tuzing ah MNDAA le ralhrangbu hna an i kah than hi a si i, khuami dihlak tluk an zaam. Mankhum, Manping lei zong an i kap cuahmah rih tiah khuami nih an chim.
July thla thawkin ralhrangbu le MNDAA kar kahdohnak a fah caah Phawngsai, Manyang, Banmoi hrawng khuami 200 hrawng cu China ramri lei ah an zaam i, ralzaam hna eidin lak nak lam cu ralhrangbu nih an phih piak hna ruangah harsatnak tampi an ton tiah KNG nih a tial.Crd: TCP
