Sagain ramtthen Minkin PDF cu, Pyosawhti timi SAC kut toi sermiphu nih, hriamnam chia in remdaihnak kan tuah lai tiah an va hlen hna hnuah ralhrang nih minung minkin PDF milu 50 fai an tlaih dih hna ti si.
Covid ruangah hi tluk lungrethei i kan um lioah mah bantuk thawngpang hna vun theih cu thinlung nih a celh hrim lo ee. Hi hnu hmailei zong ah mah bantuk thil hi ralhrang nih an tuah lengmang rih lai caah ralring taktak kan hau.
Hmailei ahcun ralhrang nih hriamnam kan chiah lai i nan buu chung ah kan lut lai a ti zong ah khua ruat sehsai lo in cun hnatlak nak tuah bak lo ding asi. Kan unau hna PDF minung 50 ralhrang hna nih an tlaihmi hna caah biatak tein thlacam bawm cio hna u sih.
Relchap-Hakha Peng COVID-19 Runvennak Rian ca ah Mino 100 Leng Pum an i Pe. Hakha peng COVID-19 runvennak le mizaw pawl zohkhenh thlopbulnak rian ca ah mino 100 leng nih pum an i pe, tiah Hakha Township Public Healthcare (HTPH) nih thawngthanhnak ah an langhter.
Volunteer pawl cawnpiaknak cu HBA le Zion ah July 25, 26, 27 ah an tuah i sii lei fimthiamnak a cawng liomi Medical Student mino 17 telh in pum aa pemi mino 100 leng an si hna.
June 10 thawk in Hakha ah COVID-19 zawtnak a ngeimi minung 300 leng hmuh an si i minung 8 an nunnak a liam. July 26 tiang ah minung 211 nih damnak an hmu. Nihin (July 28) zong ah minung 22 an check hna i minung 8 sin in zawtnak an hmuh tthan, tiah kan theih. Crd: The Chin Journal
