Zei ruangah dah Mirang in “Redcliff” an ti hnga ti cu, fiang set cun ka thei lo. Asia pumpi ah a sau bikmi tiva cu Yangtze River (the third longest river in the world) a si. Cu tiva pi rili a vai ifonnak kiangkap hrawnghrang khi nihin Tuluk ram pumpi i an rumnak bik, an ram i a thawtnak bik le an idawhnak bik an si. Shanghai, Shenzhen, Guangzhou, Macau le Hong Kong tepawl umnak kiangkap khi si cu.
Yangtze tiva dawh taktak cungah cun, an tiva tlangpang pawl khi lungpang bantuk in an saang tuktuk hna. Tivapi karah lungpang tung sang pipi an um lengmang fawn. Ral an rak ituknak hmun zawn i lungpang vampang pawl khi sen hna sehlaw a dawh. Cucaah “Redcliff” tiah an kawhnak cu si dawh bik a si.
Tuluk tuanbia record ah “The Battle of Redcliff” cu minthang taktak a si. WWII i D-Day timi min zong a chuah behnak “Normandy Landings” nakin a let in a ropui deuh. D-Day an ti i Normandy Landings tan cu nizan nai bia si cu mu, 1943-45 kar hrawng. Lungpang Sen pawng ral an rak ituk cu AD 208 in 209 kar ah dahkaw a rak si cu.
Vawleicung tuanbia i rili cung ral ituknak ah a lianngam cem, mithi zong an rak tam cem, tilawng zong tam cem an rak khangh tan a si. Europe lei pawl i Trojan Wars (myth deuh in ruahmi a si) tepawl nakin an ropui deuh. Hi tan ahhin, vawleicung raldoh thiamnak cauk minthang bik an ti lengmangmi “The Art of War” zong cu an thluak le an thiamnak um-ek bakin an rak hman tan si fawn.
Cu Tuluk rampi siangpahrang khan an ralbawi bik mifimzer taktak Prime Minister Cao Cao le raltuknak ah strategy a thiam bak tiah minthang vemi Zhuge Liang an rak iphomhnak a si. Cao Cao nih ralkap milu le hriamnam ṭhaṭha, tilawng ṭihnung phunphun a rak hman. An tilawng hmanmi dihlak sing 8 renglo an si, ti a rak si.
Zhuge Liang nihcun, ralkap thazaang chim lo, cantiang hmanh tlamtling in aa rak ingeih lo. Sinain, ral cantiang vialte mah hriamnam ah icang dih dingin a rak mersian khawh. Ral tilawng vialte mei nih a rak kangh dih cikcek. Tuluk ram pumpi nih a therh in an therh i an rak ṭih bikmi Cao Cao cu a nunnak ikhamh dingah ui tlik le vok zaam in a rak zaamter.
Tutan Tlanghrawn le Rialti hrawnghrang ral ituknak hi “The Battle of Redcliff” he aa lo ngai. Lai pasal ṭha hna nih an erhtonhmi sachia pawl an thah dih khawh hna lebang ahcun, vawlei tuanbia ah a taang zungzal dingmi, Chin miphun hna kan tuanbia an tunmer si te lai. Crd: Salai C Alexander
