Mandalay ramtthen, Nuathugyi peng, Lawphyo khua ah a luan ciami September ni 20, kum 2021 zanlei ah khan Min Aung Hlaing ralhraang pawl kahnak in kumkhat le cheu te lawng si rihmi hngakchia pakhat telh in minung pa 5 an thih hlei ah a dang minung 2 hna zong faak ngai in hliamhma an pu tiah thah le nawn tong tu chungkhat rualchan minung pakhat nih a chim.
Zan suimilam 12:00PM hrawng ah Min Aung Hlaing ralhraang pawl cu meithal puah buin khua chung an rak luh ruangah khuami hna cu zanlai bak ah an zaam hna, mah ti an kah nak ah khua chung inn pakhat chungah ummi chungkhar minung pa 4 a hmun bak ah an thi, kumkhat le cheu hngakchia te cu a phei zawn ah meithal kuan nih kheng in sizung ah an kal pi nain an phanh tlawmpaal ah thi ve.
Ralhraang kahnak in a thimi hna hi chungkhar pakhat an si, U Bo Khin (76), Daw Than (kum 75), U Maung Htun (kum 50), Daw Maw Htee (kum 30) le Maung Zwe Htet (kumkhat le cheu) hna an si. Cun faak ngai in hliamhma pumi hna hi Daw Ngunt (kum 50) le Ku Kyaw Thu Khin (kum 30) hna an si i Mandalay sizung pi ah an thlop cuahmah lio hna.
