Kuatkhan ah ralkap uk nak kan duhlo ti langhter nak caah 2008 phunghrampi cu mino rual nih tuni march 18.2021 ah mei in an khangh thluahmah.
2008 phunghrampi cauk ruangah nihin ni tiang ralkap nih nawl ngeihnak an lak lengmang nak a si. Tutan ralkap nih nawl ngeihnak an lak mi zoh tik ah NLD nih times khat an ttuan cang i times hnih nak an peh tthan bak in remh an timh ruang ah nawl ngeih nak an lak tthan mi a si.
Kawl ralkap caah a biapi bik mi cu 2008 phunghrampi khi a si. Cu tluk a sunglawi mi le biapi mi cauk pi cu nihin ah Kuatkhan mino rual hna nih Zituat-Oo-panchian dawr thar kam ah march 18 zan suimilam 8:00pm tluk hrawng ah mei in an khangh.
Kuatkhan mino pakhat nihcun ralkap uknak hi kan duh hrimhrim lo, hmailei zawng ah kan duh loh nak pehzulh in kan langhter zungzal lai tiah Kuatkhan mino pakhat nih a chim.
Kuatkhan myo ah mipi nih ralkap uknak an duhlo tiah an langhter mi cu ralkap nih thazaang hmang in an tthawl ko hna nain pehzulh in sandahpiah nak an ngei peng tiah theih a si.
