Tuni September ni 22, kum 2021 chun suimilam 12:00PM hrawng ah Karen ramkulh, Kya-in Seikgyi peng, Natchaung khua ah Karen National Union (KNU) Bridage 6 hmunhma chungah Min Aung Hlaing ralhraang pawl le KNU ralkap hna kar ah kah dohnak a chuak tiah KNU Bridage 6 lei in thawngpaang theih a si.
Min Aung Hlaing ralhraang pawl hi KNU nih an khammi pah in an hmunhma chung an rak luh ruangah KNU Bridage 6, Battalion 17 le Sub-battalion 2 hna he kah dohnak a chuahnak hi si. Kan kham bu in an rak pah chih ruang le an rak luh ruangah kan kah hnami si, kan kah hna hnu in an rak fong ngam ti lo tiah KNU lei nih an chim.
Kahdohnak a chuakmi ah kaphnih lei in a thimi le hliamhma pumi an um le um lo tu cu theih khawh si rih lo, Min Aung Hlaing ralhraang pawl nih hin KNU do ding hrim hrim in ralhraang thazaang an chap chih hnu ah an luh hnawh hnami si.
KNU tang ah ummi Bridage 1, 2, 3, 5, 6 le 7 hmunhma chungah ralhraang pawl thazaang tthawng ngai le hriamnaam tam ngai hmang in KNU hmunhma chung an rak luh lengmang caah nifatin ti awk in kah dohnak a chuak.
