Sagaing ramtthen, Pinlebu peng chung kah dohnak ah Min Aung Hlaing ralhraang lei in ralhraang 25 nak tlawm lo an thi tiah National Unity Government lei nih thawngthanhnak an tuah, PDF lei nih ralhraang sin in hriamnaam zong tampi an laak khawh.
Tuni September ni 24, kum 2021 zing suimilam 11:50AM hrawng ah khan Sagaing ramtthen, Pinlebu peng, Ingka timi khua le Sataungpone timi khua kar ah Min Aung Hlaing raalhraang 100 hrawng le KIA nih hruaimi Kawlin People Defense Force hna kah ah kah dohnak a chuak.
An i kah lio ah hin ruah a sur tuk ruangah caan zei maw zat an i dinh hnu ah an i kap tthan, Min Aung Hlaing ralhraang lei in ralhraang 25 cung an thih hlei ah hliamhma pumi tampi an um rih, PDF lei in ralkap pa 5 hliamhma an pu ve nain an nunnak kong tu ah cun thinphan ding an um lo.
Kawlin PDF lei nih Min Aung Hlaing ralhraang pawl sin in RPG zungkhat, 60 MM zunkhat, Paiper 50 le hriamnaam dang tampi an laak khawh. A luan ciami September ni 22, kum 2021 zanlei suimilam 4:30PM hrawng zong ah khan Sagaing ramtthen, Pinlebu peng chungah ralhraang le PDF hna kar ah kah dohnak chuak in ralhraang 15 bak an rak thih hlei ah an bawi pakhat zong a phei kiak.
Cun nizan September ni 23, kum 2021 zanlei zongah Sagaing ramtthen, Monywa khua, Kyoke Kar lam cung ah ummi Mytel zung hngak tu ralhraang pakhat thilak an kah hnu ah a meithal zong an laak.
