Yangon ramtthen, Khayan khua lentecelhnak inn pi chungah bomb a puak, bomb a puah hnu ah kahdohnak chuak in khua mino pa 5 an nunnak liam i pakhat a nung in an tlaih, tuni September ni 17 zan suimilam 10:30PM i hmunung bik thawngpaang an theihnak ah cun an mah ralhraang lei zong in pa 5 an thi ve ti si.
Tu zanlei suimilam 6:00PM hrawng khan bomb a puak, bomb puah hnu ah meithal puah thawng a thang colh, bomb a puahnak in mah thawngpaang an ttial cuahmah lio tiang hi Min Aung Hlaing ralhraang pawl nih Khayan khua chung hmun tampi ah meithal an puah tiah khuami hna sin in theih a si.
Hi kong he pehtlai in khuami pakhat nih cun “lentecelhnak inn pi bomb a puah in kah dohnak a chuak colh, Khayan khua chung hmun kip ti awk in meithal puah thawng a thang, ralhraang pawl nih hin ruahpadamh deuh in tu tiang in meithal an puah thluahmah ko”
“Bomb puah thawng zong hi voi tam ngai a thang, hmun kip ah a puak, PDF lei in pakhat a nung in an tlaih, ralhraang palik pakhat zong a kut ah meithal kuan nih khen ve” tiah a chim, Khayan khua hi Min Aung Hlaing ralhraang pawl nih electric mei an phih hna.
