Kawlram cu kum li chung NLD nih cozah an lak hnu ah 2020 November ni 8 election an tuah i NLD nih teinak za ah za bak in teinak an hmuh ruang ah Min Aung Hlaing misual pa nih election hi a hman lo mi a si tiah hramhram in fabuary 1 ah nawl ngeihnak a lak diam.
Mah hnu in cun mipi nih ralkap uknak duhlo in heh tiah sandahpiah nak an tuah cawlh. Mah sandahpiahnak ruang ahcun ralkap nih civil mi minung tampi an thah hna. Cheu khat palik pawl cu mipi nih an dirhmi CDM ah an luh ruangah ralkap nih tlaih an timh hna caah Mizoram lei ah an zam.
Nizan march 15 tiang ah khan kawlram buainak ruangah India ram ah kawlram mi minung 400 leng ah an lut cang tiah RFA Burmese nihcun a chim. Hi ralzam minung zali lak ah hin a tam u cu palik an si tiah a chim fawn.
Kan hnung zarh friday ah khan nikhat cung lawng bak ah minung 116 bak India ram Mizoram ah an zam tiah RFA Burmese nihcun a chim. Hi a zam mi hna chung ah hin cheukhat cu angki ttha tein aiken mi an um lio ah cheukhat cu zeihmanh ai ken lo in a zam mi zawng an tampi ve fawn.
Minung hi vialte an zamnak a ruang cu CDM ah a luhmi paoh ralkap nih tlaih an timh hna ruangah an zam nak a si. Hi kawng he pehtlain ralkap le India cozah chonh biaknak an ngeih ruangah India cozah nih Mizoram le kawlram ramri ah duty ding in ralkap tampi a tlah hna tiah theih a si. Source: RFA Burmese
