James Vnl: Thei a thumi pakhatte kha theiṭhami lakah chiaṭi hna law chikhatte ah a thutpi dih hna lai lo. Asinain caan sau a rauh deuhdeuh tikah duhsatein nikhat hnu nikhat in a thutpi chih hna lai. Theiṭha nih zeitindah ka thut ti aa hngal lai lo nain ka thu cang tiah arim le a color aa thlen hnu cun ei awk a tlak ti lo. Hlonh awk men asi cang.
Cubantukin kan umnak hmun hi abiapitukmi asi. Mikong ceihmi hna sin ah na ṭhut lengmang ahcun mikong na ceih ve ko lai. Ṭhatlonak a tuahmi hna sin ah na ṭhut ve lengmang ahcun ṭhatlonak na tuah ve ko lai.
Hawikom ṭhalo he na umṭi lengmang ahcun pumsa duhnak le nuamnak nih an lem ve ko lai. Pathian thangṭhat huam lomi he na umṭi lengmang ahcun Biakinn phak na huam ve lai lo. Len le vah a huamtukmi hna he na umṭi ahcun na caan sunglawi alakin na liamter dih ko lai.
Zuu, siiṭhalo a tawngmi hna he na umṭi lengmang ahcun zuu le siiṭhalo nih an lem ve ko lai. Pathian nihsawhmi hna le Bible bia zeirellomi hna sin ah na umṭi lengmang ahcun Bible na zumhnak a tlau cuahmah ko lai. Kan umnak hmun hi khoika dah kan um ti ihngalh hi abiapitukmi asi.
Chikhatte ah sualnak le ṭhatlonak nih kan thinlung a kan thleng dih lai lo. Asinain duhsatein kan thinlung hi sualnak lei ah a kan kalpi cuahmah. Thilṭha lo pakhat khat nih a kan lem hnucun chuah ṭhan le tei khawh a har tuk cang. Cucaah Jesuh Khrih he umṭi, kalṭi lengmang hna usih! Nifatin Bible rel lengmang hna usih!
Miṭhalo hna khuakhaannak ah aa tel lo i Misual hna lam zong a zul lo i Pathian a nihsawhmi hna sinah a ṭhu lomi cu Thluachuakmi an si. An ilawmhnak cu Bawipa nawlbia tu ahkhan asi i cu nawlbia cu chunzan in an ruat (Salm 1:1-2).
