Laimi Biaknak Lei kan Pa Rev. Dr. Robert Hniar Ceu a Nunnak a Liam. Laimi lak ah biaknak lei kan pa pakhat a simi Rev. Dr. Robert Hniar Ceu (kum 88) cu nihin (July 29) zinglei ah Yangon ah a nunnak a liam.
Rev. Dr. Robert Hniar Ceu cu HBA ah GS a ttuan hnu ah Chin Baptist Convention (ahlan ZBC) zong ah GS rian a rak ttuanmi a si.
Gangaw Baptist Association ah GS rian le MBC Minister Department ah Director rian zong a rak ttuan balmi biaknak lei kan pa pakhat a si.
Oxygen pek buin ni zeimawzat an thlop hnu ah a nunnak nih a zawh ti lo caah nihin zinglei sml. 4:00 ah Pathian ttangnem ah aa kan dinhtak cang. A nunnak a liam caan tiang ah Yangon khua i Chin Baptist Church (CBC) ah Honorary Pastor dirhmun in Pathian rian a ttuanmi a si.
Relchap-Thantlang Peng Vanzang Khua Ah Inn A Kaang. July 29 zinglei suimilaam 3:50 hrawng ah Thantlang peng Vanzang khua ah inn khat a kaang tiah khuami hna sin in kan theih.
A kaang mi inn cu Pu Thawng Uk Cung inn a si i a pawng inn pakhat zong tlawmpal a kanghchih nain khuami nih an hmih khawh. Inn a kangh lio ah hin, inn ngeitu Pu Thawng Uk Cung le a nupi cu lo ah an riak i inn hngaktu an um lo tiah khuami nih an chim.
“Inn ngeitu lo ah an riah kar ah a kaang mi a si. An fale zong an pi le inn ah an chiah ta hna le inn ah mi an um lo,” tiah Vanzang khuami pakhat nih The Hakha Post ah a chim.
A kaang mi inn chung thilri zei hmanh an chuah manh lo i zei ruang ah dah a kangh ti mi fiang in hngalh a si rih lo nain vok rawl chuannak mei in aa thawk mi a si kho, ti zong a chim. Vanzang khua cu Thantlang peng, Vanzang tlang ah a um mi, inn 100 fai khuasaknak khua a si. Crd: The Hakha Post
