Yangon Ah Covid -19 Zawtnak In Ni Fatin A thi Mi 1000 Tluk An Si Kawlram chung ah Covid -19 a voithumnak a karhtuk caah Covid ruang ah nifatin a thi mi minung 1000 tluk an si i ruak phur a bawm tu mawtaw paawl an i zat ti lo caah Inn mawtaw Lantack mawtaw pawl in ruak pawl cu thlan ah an thlah hna tiah khua mi pawl le mibawmtu phu cheukhat sinin kan theih.
Thlan i nawlngeitu hna nih a sining an thlen an mah i kan phorh mi ruak cu chiah i kaltak a ngah lo. Kan phorh mi ruak vui caan a phak hlan lo mawtaw cung in thumh lo in hngah a si.Mah ruang ah ruak pakhat kan va chiah ah hin a tlawm bik suimilam 3:00 kan rau.Ruak kan va thlah ahhin mawtaw pakhat ah ruak 2 si lo le ruak 3 kan phorh.Ruak phorh ding in phone a kan chawn mi hi kan letmi hna an tam tiah, mibawmtu chung tel pakhat nih a chim.
Harsa mi bawmtu phu pawl nih ruak phorh ding in an kan chimh cia mi an tam caah thih loh an ton ahcun mi dang he i ton in mawtaw hlan ti,ti bantuk, anmah i ngeih mi mawtaw hna in ruak pawl cu an thlah hna .
Cisuh thlanhmun ah Lantack mawtaw pakhat kan hmuh ruak 3 a phorh.Vengkhat i thihloh nak a tong mi pawl kha fonh in an rak thlah hi a si.Inn hman mi mawtaw hna in an rak thlah mi hna kan hmuh.Mah kan chim mi hi a dik bak mi a si tiah Sout Dagon hrsa bawmtu phu ah a tel mi pakhat nih a chim.
Harsa bawmtu phu a cheukhat i an ruahnak ah Yangon ah Covid ruang in a thi mi hi nikhat ah ruak 1000 hi a um lai tiah an ti.Tu hrawng cu ruak phorh ding ah a kan chawn tu hi an tamtuk.Kan nih zong nih kan duh ning tluk in kan bawm kho hna lo.Yangin khuapi chungah hin thlan hmun 4 a um i nikhat ah a thi mi hi 1000 a si lai tiah ka ruah.Mithmuh bak in mi thi an karhtuk ti in harsa bawmtu phu ah aa tel mi pakhat nih a chim. Crd: TCP
Relchap-Minung nih a ruah awk kan theih tawn lomi Pathian thluachuah nganbik. Atu lio kan Kawlram dirhmun ah zei dangdang nak in minung nih kan herh bikmj cu Oxygen a si. A dammi zong nih ralrin ah i chiah cio a si.
A zawmi zong Oxygen bur an i hunh cun an hna a ngam. Cu lak ah a zawt a zual tuk i Oxygen nih a dih tak thluahmah mi hna ca ko ah lung a tha lo tuk. A fiangmi cu an dawpmi Oxygen a dih cun a thi ding khi an si. Oxygen i thlaih tuk zong tih a nung. Cheukhat cu tamtuk an i thlaih caah an thluak tiang a rawk i an thi thiam.
Cu lak ah cu tluk a sunglawi mi Oxygen cawk hau lo tein a za tawk tein nifatin dawp ding thli a ngei i THAW a ngei rihmi kan si hi zeitluk mivantha dah kan si. Zeitluk in dah Pathian kan caah a that.
Oxygen zeitluk in dah a man a fah. Mirum a cawknak phaisa ngei ko hna hmanhseh a cawk awk Oxygen a um ti lo caah mah hngal bu tein an nunnak a dih mi an tampi.
Cucaah nihin a lak tein kan dawpmi thli le kan THAW caah hin petu Pathian sin ah lawmhnak bia chim ding kan si. Zeidang kong cu kan ruat kan buai len nain caan tampi ah kan dawpmi thli kong hi a ruah awk kan thei tawn lo.
Chungkhar cio ah Oxygen cawk hau dirhmun ah um usilaw Bur zeizat dah a herh hnga? zei tiang khi dah a kan nguh hnga. Aamahkhan awk a tha lo. A thimi lakah a nungmi le a zawmi lakah a dammi kan si i Pathian thawng lawnglawng a si. Crd: TCT
