Nizan Kalaymyo ah Covid-19 test nak minung 48 an tuah hna i mah chung ahcun minung 31 an positive tiah hmuh an si. Covid-19 pulrai ruangah Kalay myo ah Nunnak liam-2 (Tahan ah nu kum 53 mi le,Mohlin khua in pa kum 70). Tuhinni tiang ah Nunnak liammi dihlak-12 an si.
Nizan june 7 ah khan Tonzang peng chungah minung 19 Covid positive hmuhchap an si. Tonzang sii-inn ah zohfelmi(16) an si i, mah chung ah hmuhmi (7) an si. Tonzang peng chung ah Covid in Nunnak liam (1) an si i, an dihlak nunnak liammi minung 2 an si. Zawtnak, Hmuhmi dihlak fonh(115) an si i, dam tthanmi minung 11 an si.
Nizan june 7 ah khan Cikha sii-inn ah Covid zohfelmi (45) an si i, positive thar an um lo tiah theih asi. Cikha khua ah Covid zawtnak hmuhmi dihlak(182). Nihinni tiang ah Nunnak liammi dihlak(6) an si i, a dam tthanmi 22 an si.
Nizan june 7 tiang ah khan Tonzang peng ah Covid zawtnak hmuhmi dihlak(297) an si. Cun Rihkhuadar ah Covid 19 zawtnak zohfelnak ah hmuhmi 6 an um. Zohfelmi (52) chung in positive hmuhmi (6) an si.
Vawleicung killi um Laimi/ Chin miphun nih kan ram le miphun caah biatak tein thlacamnak he ngeihchiah chawve he bomh an herh lio caan a si. Ralhrang nih nichiar an tuk an den i an thah cuahmah lioah Covid-19 pulrai ttihnung nih a vun den tthan mi hna ruah ahcun lungrawk taktak a si.
