Kalaymyo – Innya-kung Sang ah nizaan (june 19) zaanlei suimilaam 9:10 pm hrawng ah ralhrang ralkap pawl nih Inn pakhat cu am kulh i meithal in an kah ruangah minung 4 an thi i, pakhat cu a mit ah an hliamh tiah Kalaymyo khuami sin in theih asi.
“Ralhrang motor 5 in an van phan i inn cu an kulh hnu ah lungin an cheh lio hna ah inn chungin minung pakhat a rak chuak i a au lio ah a dang pafa hna cu an zaam i an kah hna caah an fapa in an thi colh. Cun an u nu pakhat cu a mit ah an hliamh i sizungah aum. An kahnak inn i an motor le thilri an lak. Ralhrang pawl nih Mipi nih an lak mi asi tibantuk khin an tuah” a tak ah cun an mah ralhrang tuah mi lawng te asi tiah khuami pakhat nih a chim.
Ralhrang ralkap nih an kah ruangah Inn neitu Nu pa, an fapa le an khual pakhat an dihlak minung 4 an thi i, a mit ah an hliamh mi nu pakhat cu ralkap sizung ah an chiah tiah kan theih.
Ralhrang ralkap nih an kah hna hnu zinglei suimilam 2 hrawngah kum tling lo minung 2 le kum 30 hrawng asi mi minung pakhat zong an inn chungah an luhhnawh hna i an tlaih hna tiah theih asi.
Tlaih a tong mi hna cu Kalaymyo Chainmyah Aungsi sang Ayeyawady lakphak dawr neitu i an fa kum 12 rual (A nu le pa an um lo caah a mah an kal pi) cu a dam lo i zaan an inn chungah a ih lioah an tlaih. Cun Be-inn sang ah Kyaw Min Khat Aung (kum 15 rual) le Myanmar Economic Bank i vuan tthan asi mi Ko Aung Myat Moe (kum 35) an si tiah theih asi.Crd: Khonuntung
