Kayar (Karenni) ramkulh, Dimawso peng, Kung Thar khua le Tesule timi khua pawngah uknak chut tu le mipi a kan that cuahmah tu Min Aung Hlaing ralhraang hna le mipi vengtu ralkap hna kah ah tuni September ni 25, kum 2021 zing in khan kah dohnak faak a chuak tthan.
Min Aung Hlaing khuachia ralhraang pawl hi Kung Tha khua le Tesulee khua pawng ummi khuami hna nih an neihmi inn chungah hmunhma le cherhchan la in thazaang tam lak te an i chap hnu ah tuzing in khan PDF, KNDF le KA ralkap aa fonhmi hna he faak ngai in an i kap.
Tuzing an i kahnak kong he pehtlai in mipi vengtu ralkap lei nih “ralhraang thazaang 200 hrawng in Dimawso peng chung Daung Kha timi khua lei ah a rak lutmi pawl le kan mah Dimawso PDF, KNDF le KA hna kar ah Dimawso peng Kungthar khua le Tesulee khua pawng ah tuzung suimilam 9:00AM hrawng khan tu tiang hi kan i kap thluahmah ko”
“Min Aung Hlaing ralhraang pawl nih mipi hna neihmi inn le lo an hrawh piak hna i mah ka hmun ah cun an mah tu hmunhma an khuar” tiah thawngthanhnak an tuahmi chungah cun an langhter. Ralhraang pawl nih hin lamhlaat bomb kahnak tiang an hman, tuzing kah dohnak ah kaphnih lei in a thimi le hliamhma pumi an um le um lo theih khawh si rih lo.
