Chinmi nih kan uarmi le MMA ah aa ṭhuat paoh ahcun tlolh loin kan zoh zungzalmi Aung La N Sang, Kachin kan unaupa cu aralaimi July ni 30 (Cawnningani) ahkhin i ṭhuatpuai celh ding a ngei cang. Tutan ahhin Leandro Atadies, Brazil pa hehin Lightweight I cuh in aa ṭhua ding an si. Tutan annih pahnih an i ṭhuat hi zoh an nuam ngaingai lai ti ciomi le hngahhlang ngaimi a si ko. An hnulei tuanbia le sining dirhmun tlawmpal in vun zoh usih law;
Aung La N Sang hi MMA ah voi 38 aa ṭhuatmi chungah voi 26 teinak a co i, voi 12 a sung bal. Tutan Aung La N Sang nih a dir-onh dingmi pa hi MMA ah voi 15 aa ṭhua bal ve cangmi a si i, hi chungah hin voi 11 teinak a comi a si i, voi 4 a rak sung ve.
Hiti MMA ṭhuatcelh-puai ah an dirhmun zoh le cuanh tikah Aung La N Sang cu ṭhuat aa celh tam deuh le tehton hmuhmi ngeih deuh a si tikah Aung La caah zaangdam deuh ngaingai cu asi kan ti khawhmi a si ko hnga.
An tung niamsan lei vun zoh nolh ṭhan tikah, Aung La N Sang hi pe 6 le lemah 1 a sang i, Leandro Atadies cu pe 6 asi, lehmah pakhat in Aung La a sang deuh tinak a si.
Aung La N Sang le Leandro Atadies hna hi Reinier de Ridder nih a tei veve mi hna pahnih an si caah an puai hi zoh a nuam te ko lai. Aung La hi Reinier nih voi hnih a tei i, tutan ah a zuamcawh dingmi Brazil pa Atadies hi Reinier nih voi khat a rak tei bal ve.
An pahnih in hin mi bomban ṭha le tharul ngeimi tiah kan timi phun an si lawng si loin an mi thongh a fak ngai veve mi an si tikah an puai hi zoh a dawh taktak te ding a si ko tiah ruah cio a si. Nang aho dah na zumh deuh?
