Hriam nei lo mipi hmai ah cun sahrang an lo. KIA nih an von phomh tak hna cun an bok viar. An mit hmanh an au ngam set lo. Nizan ah KIA nih misual ralkap 40 an thah hna sakhan 3 an lak i kawl ralkap an tlaihmi hna zawng rawl khim tein an pek hna. Video Link
Min Aung Hlaing hruai mi Uico hrut pawl nih mah bantuk khin KIA ralkap tlai hna sehlaw an rawl pek cu chim lo an nghawng hmanh an tan piak cawlh hna lai ka zumh. Atu lio KIA mi kah le doh cu tih a nung bak. Kawl ralkap nih a celh an celh lo.
Nizan March 24 zanlei suimilam 5:30 tluk ah Kachin Ban-maw khayan Mo-moh peng ummi KIA Tatmaha 5 tang tatzin 25 le 30 hna nih an pawng Kawl ralkap Hk. M. Y 387 sakhan cu an nam hna i nihin zing suimilam 5:00 tiang fak taktak in an i kap.
Hi an i kahnak ah KIA nih kawl ralkap 40 leng an thah hna Bohmu pakhat telh in minung 4 a nung in an tlaih hna. An hriamnam zong an lak dih. Cun mah kawl ralkap umnak pawng tlang cung um kawl ralkap sakhan hme 2 zong KIA nih an lak chih.
KIA ralkawp pa nihcun internet line ttha te kan neih khawh tik ah kawl ralkap kan thah mi hna le an hriamnam kan lak piak mi vialte tling tein a video in kan rak langhter te lai tiah a chim. KIA hi ralkap phung a zulmi cu an si. An tlaihmi hna zong kan ral nan si ai tiah an that hna lo.
Tha tein an zohkhenh hna. Cu hlan cu phaisa zong an rawnh hna i an thlah tawn hna. Kawl ralkap le KIA an i dan nak cu mah bantuk an ral le ral an ni tlaih caan ah khin theih khawh khun an si. Kawl ralkap nihcun KIA ralkap cu chim lo sualnak pakhat te hmanh a tuah lo mipi tiang an thah hna.
KIA, KNU ralkap cu an thawng tuk ko nain cozah pakhat bak ramtlang hriamtlai phu nih vun tei lai ding mi cu thil fawi a si lo caah tei nak taktak an hmuh khawhnak ding ahcun a nung Pathian nih a dirkamh hna lawng ah a si lai. Mah ruang ahcun kawl ralkap in hramhram bak in nawl ngeihnak an lak mi an chuh tthan khawh nak lai fakpi in thlacam bawm ko hna sih.
