Hmawbi um Paletwa ralzam hna caah lunglomh naak taktak thawng ttha, Paletwa um ralzam hna ca ah inn hmun ting 250 in zumh ngamhnaak in a ba in ka cawk piak hna. BAWIPA a ttha tuk i a hmun ngeitu lila nih ting 20 ( 2000000 ) kan hlut lai an ti.
A tu ni hin ah American Columbus Ohio khua um Emanuel Chin Baptist Church nih tangka ting 36 kan in bomh hna an ti i nihin zanlei ah an van ka kuat colh. Hi biak inn hi a tu zumtu tampi nih thla kan cam piakmi Rev. Dr. Hai Vung Lian senior Pastor a ttuannaak church a si. Ni kum ah Pahlun nu he kan va tlawng hna i phungchim naak zong kan ngei bal.
A tu hi tluk in ralzam hna ca an kan bomh tik ah kan i lawm tuk hringhran. An members dihlak BAWIPA PATHIAN nih thluachuahnaak pee hna seh law an pastor Rev. Dr. Hai Vung Lian hrimhrim zong a rannaak in dam ter tthan hram ko seh.
BAWIPA PATHIAN HI KHUARUAHHAR TAKTAK PATHIAN A SI: PATHIAN nih Paletwa ralzam har tongmi hna ca ah rian a ka fial bang in mitthli he lung lawm te in ttuan kaa tim. Ka ca rianttuan ah sawm ve hna law a duh takmi nih in bawm hna seh tiah zahan zan ah a ka chimh. An in bomh lo zong
ah KEIMAH nih kan ttuanpi lai i na tlaam tlinh ko lai tiah a ka chimh chih fawn.
PATHIAN nih bia a ka chimh ti hi ka chim ngam lo. Cu cu a tu har tongmi hna ca ah rua tung le danih ngaidii hmang lo in thing tung le canphio cih in inn na sak piak hna lai, a ka daw mi nih in bawm hna seh a ka ti mi a si.
Ngeih lo bu in thing tung le canphio cih in inn 18 sak cu a fawi bak lo. Ka ngeihlah nawn kha BAWIPA nih a theih i “ phanghlah bawmtu kan thlah ko lai “ tiah a ka ti chih. Ni hin cu an inn tthial ah kan kal tthan. Rua tung le danih dii in cih kan timh lio ah BAWIPA nih minung a van thlah taktak hna i ka ning a zak tuk i mitthli he thla tu ka cam.
BAWIPA nih canphio inn in inn hnih sak ding ttuanvo lak ding in a van thlah mihna an si i tangka ting 10 ( 1000000 MK ) an van Kan peek taktak. BAWIPA hi khuaruah har PATHIAN taktak a si.
Bomh le tel a duh vemi inn khat saknaak ah ting 7 ( 700000 MK ) in i tel khawh a si. BAWIPA nih thluachuahnaak in pee ko hna sehCredit: JP Biak Tin Sang
