Khuachia ralhraang simi Min Aung Hlaing te phu dohnak cu nikhat hnu nikhat in a hung linhsat chin thluahmah bantuk in tu ah cun khuapi chung zongah kah dohnak a chuak thluahmah cang caah mipi lei nih puahkeh thawng nan theih tik ah nan mah he aa neihniam biknak ding, nan himnak hmun ah zaam le rol ding in siseh ralhraang phu he a si khawh chung in lamhlaat ah um ding in Civil Guerrilla Force (CGF) nih thawngthanhnak an tuah.
Yangon ramtthen, Hlaingtharyar ah dirhmi CGF hriamtlai phu nih nizan September ni 21, kum 2021 zanlei suimilam 3:30PM thok khan Anawyattha lam cungah ummi Yugyi le Yutee timi kar ah kah dohnak pakhat an vun thok cang, lamhlaat in control khawhmi bomb pa 6 hmang in ralhraang pawl an phomh hna.
Hi bomb puahnak ah hin uniform aa hruk lomi ralhraang pawl tam lak te hliamhma an pu nain CGF lei in in cun hliamhma pumi pakhat hmanh an um lo. Hlaingtharyar hi ralhraang uknak kan duh lo tiin sandah piah ruangah ralhraang nih tampi an rak thah hnanak hmun si.
Nizan September ni 21 zanlei ah khan ralhraang lei in Captain range simi le ralhraang palik bawi pakhat an cuannak motor bomb in an puah khawh ruangah a cung cuangmi an dihlak in sizung an phan viar. Kan nih CGF nih cun mipi hna himnak ding hi a si khawh chung in kan i zuam lai, mipi lei zong nih kan mah he hmunkhat ah ttang tti ding in kan in sawm hna tiah thawngthanhnak an tuah.
