COVID-19 Kham Sii Ting Tampi Myanmar ah a Phan Lai tiah Dr. Sasa nih Chim. A ruah hlan ah Myanmar ramchung ah COVID-19 runvennak sii ting tampi Myanmar ram ah a phan lai, tiah Dr. Sasa nih nihin zaanlei ah a Facebook ah a tar.
“Myanmar ram ca ah COVID-19 kham sii hmu kho ding in ram kip mibawmtu hna le zatlang bu hne he chunzaan in pehtlaihnak kan tuah,” tiah a langhter. “A rauh hlan ah Myanmar ram ah COVID-19 runvennak sii million in a rak phan cang lai,” tiah a langhter chap.
“COVID-19 runvennak sii tlamtling in a phak khawh nakhnga le zapi nih an i chunh khawh nakhnga rammi le rammi i bawmh timi lungput in kan ttuan tti hna lai. Rammi an biapi bik timi lungput he ning le cang ngei tein kan tawlrel lai,” tiah Dr. Sasa nih pehzul in a langhter.
Cun, Myanmar rammi hna nih bawmchantu tthatthi ngei loin COVID-19 zawtnak fak tuk in kan tuar lio ah Oxygen chuhnak le nunthap nih mizaw a zohtu sibawite tlaihkhihnak a tuahtu SAC ralhrang cung ah Dr. Sasa nih mawhchiatnak fak ngaiin an tuah chap.
“Atu bantuk in SAC ralhrang nih ruru hranghrang in thil an tuahmi hi nuhrin covo direct in buar a si,” tiah a chim.
Dr. Sasa (NUG) nih an tawlrelmi COVID-19 runvennak sii pawl hi aruah hlan ah a phan lai tiah ti a si nain zeitik ah dah a phak lai, zeitindah ramchung an luhpi a si lai, zeitindah sichunhnak tuah a si lai tibantuk pawl fiang in zapi sin ah langhter a si lo. Crd: The Chin Journal
