Mizoram Lei Ralzaam Tio Kaam Ah An Taap,June 10 hrawngah Hakha le Thantlang peng CDF le ralhrangbu i kahnak a chuah ruangah minung 100 hrawng cu Mizoram ah lei himnak kawl in an rak zaam.
Thantlang peng le Mizoram ramri Farkawn in luh a tim mi hna hi Covid-19 ruangah Mizoram cozah nih luh an sianh hna lo caah Tio tiva kaam ah Tuipuiral YMA group nih i dornak an tuah piak hna tiah theih a si.
Ralhrangbu nih rampi nawlngeihnak a lak duhlo in CDM a lut mi cozah riantuan tampi Mizoram ah himnak kawl in an rak zaam. Amah belte cu lakhua in a rak zaam mi an si, tulio kan ram hmun cheukhat ah boruak tlawmpal a daih deuh caah le Mizoram Covid dirhmun a that lo ruangah ei le din kawlhawl nakah harsatnak tampi an ton caah cheukhat cu a kir mi zong an um.
Mizoram cozah cazin ningah Mizoram ah a dor mi ralzaam hna hi 16000 hrawng an si. Champhai district chungah 3700 an um. SYMA nih a chim ningah SYMA nih theihpinak in a kir mi hi 500 hrawng a si cang tiah theih a si.
Atu Kawlram lei ralhrangbu cawlcangh ning zoh ah ralzaam hna hi kir khawh ding dirhmun an si lo caah Tuipuiral YMA nih Zawlsei ah ralzaam umhmun sak an timh tiah theih a si i, chikhat an i dorhnak hmun zong Farkawn, Chawngtui le Vaphai ah sak timh lio a si tiah theih a si. Crd: TCP
