Thantlang khua, Zung Hmun sang ah a ummi Pu Lal Maung Cung, (Kum 2010 – 2015 MP ṭuanmi) nih atulio zawtnak COVID-19 in ruahlo tuk le sian lo bu tein nihin July ni 29, 2021, zanlei Sml. 9:45PM ah hi vawlei nunnak kaltak in sertu Pathian sinah a kan dinhtak cang thawng kan theih.
Pu Lal Maung Cung hi, Pu Ngun Iap (tleicia) le Pi Tha Nu (tleicia) hna i an fale hna lakah palinak upa asi. A chuahpi unau hna ai changchang tein ka vun ṭial hna lai; 1. Pi Tial Awi (Rgn), 2. Pi Sui Zi (Check ram), 3. Pi Man Cuai (Thantlang), 4. Pu Lal Maung Cung (nihin 29.07.2021 ah mual a liam), 5. Pu Bawi Uk Thang (USA), 6. Pi E Ly (Thantlang), 7. Pu Siang Hu (USA) 8. Pu Thawng Za Lian (USA), 9. Pu Biak Sang (USA) le 10. Salai Van Lian Bawi (tleicia) hi kan si.
Salai Van Lian Bawi an nauhniang bik nih a luancia July ni 18 zan suimilam 11:30PM ah Rangoon North Dagon ah mual a rak kan liamtak.
Tukum chungah a hlei in Chinmi chungin Pathian rian a ṭuan lio cuahmahmi hna tampi nih ruah lo tuk in mual an kan liamtak lengmang cu a poi tuk hringhran. Cu lawng si loin Mino le upa, ramkhel lei kan pale bochanmi hna zong nih ruahlo pipi in an kan liamtak van hmuh tikah ngaih a chia i a tuar a har tuk hringhran.
Nan miphun hawi hnale, na khrihfabu, na khuami, na sang le veng ummi nih chungkhar unau sahlawh rualchan nan dihlak nan ngaihchiatnak, nan mitthli tlaknak nanmah tluk tein kan in hrawmpi ve hna.
Tantakmi chungkhar, a khrihfabu, cingla rualchan, hawile kom le ule nau vialte ngaihchiatnak le tuarnak mitthli cu Bawipa kan Pathian nih a ṭha bik in in hnem hram ko hna seh.
