Kan theih dih cio bang in kawlram mipi cu fabuary nikhat ni ah ralkap nih nawl ngeihnak an lak hnu ah mipi nih heh tiah duhlo nak langhter in sandahpiah in lam an zawh. Hi lam zawh nak ah hin mipi lawng hmanh si lo in cheukhat palik pawl zawng an ni tel ve.
Mipi nih tapung ralkap uk duhlo nak langhter in lam an zawh nak ah palik unau pahnih zawng nih tapung ralkap uknak an duhlo nak langhter in an kutdong pathum an thlir ruang ah Min Aung Hlaing misual pa nih an unau pahnih in kum khat chung thawngtla ding in bia chahnak an tuah piak tiah DVB Tv nihcun a chim.
Tapung ralkap nih an tlaihmi palik unau pahnih i an hringtu nu nih a chim mi cu uar a um kho taktak. A chim mi bia cu mipi nih ralkap uknak duhlo nak an langhter nak ah an ni tel ve ruang ah tlaihkhih an tawng in tu ahcun thonginn tiang an phan cang ko nain ka lung a fak bak lo ka fale pahnih nih an tuahmi ruangah ka upat taktak hna tiah a chim.
Mah hna palik unau pahnih cu khawzei thonginn ah dah an chiah hna tihmi cu theih a si rih lo. Tapung ralkap nih an tlaihmi palik unau lak ah a upa deuh Tu Ring Lin hi palik a ttuannak kum 7 a si cang tiah theih a si. A nau pa Ta Zar Lin cu kum 4 a ttuannak a si ve cang tiah theih a si.
Mah hna palik unau pahnih cu kawlram palik nih phung an neih mi hmang in dantatnak an pek mi hna a si tiah DVB Tv nihcun a langhter. Mah hna unau lawng hmanh si lo in midang tampi tapung ralkap nih an tlaihmi hna caah biatak tein thlacamnak in bawm cio hna u sih.
